Kokaina në banane, dalin emrat e inspektorit të AKU dhe doganierit

Dy persona janë vënë në pranga për ngarkesën 119 kg kokainë të kapur në kontejnerin e bananeve në një magazinë në Vaqarr. Bëhet fjalë për shtetasit Julian Merhori, agjent doganor në Portin e Durrësit si dhe Bujar Qurku, inspektor i AKU. Fleta shoqëruese e mallit e firmosur nga AKU ka rezultuar me probleme, ndërsa janë sekuestruar të gjitha dokumentet dhe procedurat e ndjekura për këtë kontenier bananesh ku fshihej lënda narkotike.

Grupi hetimor po vijon punën për zbardhjen e personave të përfshirë në sasinë e kokainës që mbërriti nga Porti i Durrësit dhe u zbarkua në një magazinë në Vaqarr. Të pyetur lidhur me këtë çështje janë të paktën 9 persona, të punësuar në skanerin e portit të Durrësit si dhe punonjës të Autoritetit Kombëtar Ushqimor. Ndonëse në kontenier fshihej në sasi e konsiderueshme lënde narkotike, skaneri doli i pastër duke mos e konstatuar atë.