Në një postim në rrjetin social Facebook, një ditë para mbajtjes së zgjedhjeve parlamentare, Kryetari i Partisë Demokratike, Sali Berisha, ka denoncuar atë që ai e cilëson si një skemë të blerjes së votave, duke akuzuar drejtpërdrejt deputetin Vullnet Sinaj. Berisha e ka cilësuar veprimin si “krim të shëmtuar” dhe ka publikuar të plotë mesazhin e një “qytetari dixhital”, i cili pretendon se ka informacion të saktë dhe sekret për këtë aktivitet në Bashkinë Selenicë dhe zonën e Lumit të Vlorës.
Në postimin e tij, Berisha shkruan: “Krimineli Vullnet Sinaj blen vota! Dënoj me forcën më të madhe krimin e tij të shëmtuar. Lexoni denoncimin e qytetarit digital!”
Më pas, ai ndan mesazhin e ardhur nga “qytetari dixhital”, i cili fillimisht uron për një fitore të thellë dhe më pas detajon informacionin: “Po ju dërgoj një informacion shumë të saktë dhe tepër sekret për ne territorin e Bashkisë Selenicë dhe lumin e Vlorës. Deputeti Vullnet Sinaj me armatën e tij të kamufluar, mbrëmë kanë bërë listat e fundit për shpërndarje të zarfave në zonë dhe sot do bëjnë veprimet e tyre.”
Denoncuesi përmend disa individë dhe biznese që pretendohet se janë përfshirë në shpërndarjen e zarfave me para:
- Një karburant në Peshkëpi me emrin “Mesa oil”, në pronësi të shtetasit Mirosh Hoxhaj.
- Kryetari i partisë në Vllahinë, Florjan Muça, i cili pretendohet se ka marrë lista me zarfa.
- Soklo Hodaj në Selenicë dhe një biznes në Vlorë.
- Engjëllush Bellaj, babai i kryetarit të Bashkisë Selenicë, i cili pretendohet se ka lista me zarfa në zonë dhe në biznesin e tij në Vlorë.
- Menaxheri kryesor i Big Market, Arsen Devollaj, i cili thuhet se operon në zonën e Lumit të Vlorës dhe në Himarë.
“Qytetari dixhital” i kërkon Berishës ta denoncojë çështjen në mënyrë sekrete, duke shprehur mosbesim te policia pasi pretendon se të akuzuarit “kanë mbështetje”, dhe kërkon ruajtjen e anonimitetit të tij.
Ky denoncim i bërë publik nga lideri i opozitës në prag të ditës së zgjedhjeve shton tensionet dhe akuzat për parregullsi në procesin zgjedhor. Mbetet për t’u parë nëse këto pretendime do të hetohen nga organet kompetente.
Discussion about this post