Një incident me sfond elektoral ka ndodhur në Dibër mbrëmjen e kësaj të shtunë, në vigjilje të zgjedhjeve parlamentare të 11 Majit.
Sipas informacioneve paraprake nga disa burime, një grup simpatizantësh dhe anëtarësh të PD-së kanë bllokuar një automjet në fshatin në fshatin Pilafe. Sipas demokratëve, personat që ndodheshin brenda automjetit do të shpërndanin para dhe tollona nafte në këmbim të votave për PS-në në zonat e thella të Dibrës.
Mes dy grupimeve nuk kanë munguar as përplasjet fizike, ndërkohë ka pretendime edhe për të shtëna me armë zjarri.
Pas raportimeve të para mediatike për rastin, policia lokale doli me një njoftim zyrtar, duke konfirmuar se rreth orës 20.25 Xhemal Gjunkshi, kanditat për deputet i subjektit politik Partia Demokratike, ka telefonuar në sallën operative të Drejtorisë Vendore të Policisë Dibër.
Sipas bluve, ai denoncoi se në fshatin Pilafe, njësia Administrative Tomin, kanë ndaluar një shtetas që dyshohej se shpërndante para në këmbim të votave.
Gjithashtu vijon njoftimi, Xhemal Gjunkshi, ka deklaruar se një person teksa është larguar ka qëlluar njëherë me armë zjarri në ajër.
“Menjëherë është ngritur grupi hetimor i Drejtorisë Vendore të Policisë Dibër dhe nën drejtimin e SPAK dhe të Prokurorisë të Juridiksionit të Përgjithshëm Dibër po kryejnë hetimet për zbardhjen e rastit”, mbyllet njoftimi i policisë, që nuk saktëson nëse në vendngjarje janë gjetur gëzhoja.
Personat e dyshuar, që sipas demokratëve janë kapur në tentativë për të blerë vota dhe kanë qëlluar me armë janë identifikuar dhe shpallur në kërkim policor. Gjithashtu, dy automjetet janë braktisur në anë të rrugës, që dyshohet se janëp ërdorur nga të kërkuarit.
Pamje nga vendngjarja
Discussion about this post