Bllokohet procesi i numërimit në shkollën “1 Maji” në Tiranë, tërhiqen numëruesit e PD

Procesi i numërimit tek KZAZ 31 që është në ambientet e shkollës “1 Maji” në Tiranë është ndërprerë.

Shkak për ndërprerjen e numërimit ka qenë tërheqja e numëruesve të PD-së, të cilët kanë thënë se janë lodhur, por ndërkohë nuk iu kanë ardhur numëruesit.

Në një intervistë për Klan News, zv.kryetari i KZAZ-së Kelvin Shkrela u shpreh se po presin përgjigje që të punojnë edhe me dy persona, që të arrijmë objektivin e KQZ-së.

 Përse aktualisht po numërohen vetëm katër grupe?

Shkrela: Na janë larguar numëruesit e PD-së, po procedojmë me katër grupe. Na ka ardhur një njoftim nga KQZ që sipas kodit zgjedhor do duhet ta mbyllim numërimin e votës së subjektit politik brenda orës 22:00. Në këto kushte do të detyrohemi të punojmë edhe me dy persona, që të arrijmë objektivin e KQZ.

 Çfarë pretendimi kanë paraqitur përfaqësuesit e opozitës për largimin e tyre?

Shkrela: Nuk janë shprehur. Kanë shprehur lodhje, kanë kërkuar zëvendësim dhe nuk ju kanë ardhur në ndihmë të tjerë.

 Ju jeni të vendosur për të vijuar me tetë grupe numërimi?

Shkrela: Ne presim një vendim edhe nga inspektori që na mbulon në KQZ  dhe atëherë do të fillojmë edhe me tetë grupe, nga dy persona.

Ka pasur ndërprerje të procesit të numërimit?

Shkrela: Ndërprerje nuk ka pasur, por kemi qenë me numër të reduktuar.

Këtu janë 105 qendra votimi. Aktualisht sa janë numëruar?

Shkrela: Janë numëruar 17 qendra dhe 4 janë në proces.

Ndërkohë sa i përket orarit kur mund të përfundojë numërimi i votave, Shkrela shprehet se brenda orë 22:00 pritet të kemi rezultatin për subjektin politik. Me mbarimin e numërimit për subjektin politik, do të bëhet dy orë pushim për tu rikthyer për të nisur numërimi për kandidatët.