Arrestohet “mjeku” i Vllaznisë në stadium, iu gjetën dhjetëra fishekzjarrë në çantë

Një incident i pazakontë ka ndodhur mbrëmjen e sotme në stadiumin ku u zhvillua finalja e kampionatit “Abissnet Superiore” mes Vllaznisë dhe Egnatias. Policia e Tiranës ka arrestuar një person të identifikuar si “mjeku” i ekipit të Vllaznisë, i cili u kap me dhjetëra fishekzjarrë në çantën e tij të shpinës. I ndaluari është shtetasi B. F., 31 vjeç, banues në Shkodër. Gjatë kontrolleve të zakonshme të sigurisë në hyrje të stadiumit, forcat e rendit zbuluan lëndët piroteknike që ai po përpiqej t’i fuste në ambientet e brendshme të stadiumit, duke rrezikuar kështu sigurinë e ndeshjes dhe të tifozëve. Njoftimi i Policisë së Tiranës:

“Policia ka marrë të gjitha masat për garantimin e rendit dhe sigurisë për zhvillimin normal të ndeshjes ndërmjet KF Vllaznia dhe KF Egnatia. Gjatë kontrolleve, janë bllokuar dhjetëra fishekzjarrë dhe është shoqëruar shtetasi B. F., 31 vjeç, i cili i posedonte në një çantë shpine.”

Ngjarja hedh dyshime serioze mbi rolin e të arrestuarit dhe mbi mënyrën sesi persona me funksione pranë ekipeve sportive mund të abuzojnë me aksesin që u jepet gjatë ndeshjeve.