Komisioni Qendror i Zgjedhjeve ka vendosur të vijojë me numërimin e votave të mbërritura nga Greqia, të cilat ishin lënë pezull përkohësisht. Vendimi u bë publik nga kryekomisioneri Ilirjan Celibashi, i cili theksoi se nuk është konstatuar asnjë parregullsi në kutitë përkatëse, çka i hap rrugë përfshirjes së këtyre votave në rezultatin përfundimtar.
“Komisioni shtetëror i zgjedhjeve vendos vazhdimin dhe përfundimin e numërimit dhe të vlerësimit të çdo dokumentacioni zgjedhor të votuesve nga jashtë të ardhur në KQZ, si dhe tabelimin e rezultateve përkatëse për subjektet zgjedhore, kandidatët që i janë nënshtruar votimit për çdo qark. Ky numërim përfshin gjithashtu edhe zarfet që nuk janë shqyrtuar dhe janë administruar sipas vendimit të Komisionit Shtetëror të Zgjedhjeve. Ky vendim hyn në fuqi menjëherë”, tha Celibashi.
Por pak minuta pasi Komisioneri Shtetëror i zgjedhjeve Ilirjan Celibashi njoftoi vendimin për hapjen e zarfeve me votat e ardhura nga Greqia, është ndërprerë numërimi.
Ende nuk dihen arsyet e ndërprerjes, por numërimi i tyre do të vijojë ditën e nesërme në orën 8:30.
Pezullimi i votave erdhi pas kërkesës të Partisë Demokratike drejtuar KQZ-së, ku shprehën se kishte dyshime për rregullsinë e tyre. Pas vendimit fillestar të KQZ për numërimin e tyre, Partia Socialiste e kundërshtoi këtë vendim duke e ankimuar në Komisionin e Ankimimeve dhe Sanksioneve (KAS), i cili i dha të drejtë KQZ-së.
Megjithatë Partia Demokratike ka depozituar një kallëzim penal ndaj KQZ-së, duke kërkuar sërish anulimin e vendimit për numërimin e votave të mbërritura nga diaspora greke.
Më pas edhe Kolegji Zgjedhor ka rrëzuar kërkesë padinë e Partisë Demokratike, e cila kërkonte shfuqizimin e vendimit të Komisionit të Administratës Shtetërore (KAS), për numërimin e votave të ardhura nga Greqia.
PD kishte kundërshtuar lejimin e numërimit të votave të diasporës nga Greqia, duke e konsideruar këtë një shkelje të procedurave, pasi sipas tyre, kishin konstatuar problematika në mënyrën e dorëzimit dhe më pas përcjelljen e tyre në Shqipëri.
Kolegji Zgjedhor, pas shqyrtimit të kërkesës, e ka cilësuar si të pavlefshme kërkesën e PD-së, duke konfirmuar kështu vlefshmërinë e numërimit të votave të Greqisë.
Discussion about this post