Tiranë, 18 maj 2025 – Kryeministri Edi Rama ka bërë publike sot një lajm të rëndësishëm për mijëra shqiptarë që jetojnë e punojnë në Itali: Marrëveshja për njohjen e ndërsjellë të pensioneve midis Shqipërisë dhe Italisë do të hyjë në fuqi më 1 qershor 2025.
Përmes një postimi në rrjetet sociale, shoqëruar me një fotografi me Kryeministren italiane Giorgia Meloni, Rama tha se dokumenti zyrtar final i marrëveshjes është dorëzuar sot në Tiranë, duke finalizuar një proces të gjatë ligjor dhe diplomatik.
“LAJM I MIRË dhe i ndarë veç për t’i dhënë vëmendjen e duhur, jashtë vorbullës së Samitit të Komunitetit Politik Europian: Motra solli në Tiranë dokumentin final të procesit të gjatë ligjor mbi zbatimin e Marrëveshjes së Pensioneve me Italinë, që do të thotë se nga 1 qershori 2025 shqiptarët e Italisë do të nisin të përfitojnë nga kjo marrëveshje kuptimplotë për nivelin e ri të marrëdhënieve mes Shqipërisë e Italisë,” – shkroi Rama.
Çfarë përfiton diaspora shqiptare?
Me hyrjen në fuqi të kësaj marrëveshjeje:
-
Kontributet e paguara në sistemin italian të sigurimeve shoqërore do të njihen nga pala shqiptare dhe anasjelltas;
-
Qytetarët që kanë punuar në të dy vendet mund të përfitojnë një pension të përbashkët të kombinuar;
-
Do të shmangen problemet burokratike dhe vështirësitë për të provuar vitet e punës jashtë vendit.
Kjo është një prej marrëveshjeve më të rëndësishme sociale mes dy vendeve, e pritur prej shumë vitesh nga komuniteti shqiptar në Itali, i cili është ndër më të mëdhenjtë në Europë.
Marrëveshja ishte firmosur më herët, por kishte mbetur në pritje të zbatimit konkret për shkak të procedurave ligjore që kërkonin miratim të ndërsjellë nga parlamentet respektive dhe plotësim të rregulloreve teknike.
Discussion about this post