Rusia e ka shpallur “organizatë të padëshirueshme” grupit ndërkombëtar për të drejtat e njeriut, Amnesty International.
Vendimi i autoriteteve ruse të hënën nënkupton se Amnesty International është e jashtëligjshme në Rusi dhe se bashkëpunimi me të është i dënueshëm sipas ligjit rus.
Prokurori i përgjithshëm i Rusisë tha në një komunikatë të hënën se ky veprim u mor sepse Amnesty International është “qendra e përgatitjes së projekteve rusofobike në botë”. Amnesty International nuk e ka komentuar lajmin ende.
Kjo organizatë e ka fituar Çmimin Nobel për Paqe në vitin 1977 për “mbrojtjen e dinjitetit njerëzor kundër torturës” dhe Çmimin e Kombeve të Bashkuara në Fushën e të Drejtave të Njeriut në vitin 1978.
Prokurori i përgjithshëm rus gjithashtu e akuzoi Amnesty-n se po “bënte gjithçka” për ta ndihmuar përshkallëzimin e përplasjes ushtarake, duke përfshirë edhe justifikimin e “krimeve të neo-nazistëve ukrainas”.
Kremlini ka pretenduar vazhdimisht dhe rrejshëm se Ukraina udhëhiqet nga grupe “radikal nacionaliste dhe neo-naziste”, dhe e ka përdorur këtë si një nga arsyet për nisjen e pushtimit të plotë të fqinjit të saj në shkurt të vitit 2022.
Rusia pretendon se organizatat në listën e saj paraqesin kërcënim për sigurinë kombëtare të vendit.
Megjithatë, ekspertët thonë se kjo është thjesht një përpjekje nga autoritetet ruse për ta heshtur çdo zë që nuk përputhet me pikëpamjet e Kremlinit.
Dhjetëra media, organizata që merren me veprimtari politike, kulturore dhe arsimore, që mbështesin institucionet demokratike, si dhe organizata fetare, janë futur në këtë listë vitet e fundit.
Në janar 2024, edhe Radio Evropa e Lirë u përfshi në këtë listë.
Qytetarët rusë përballen me burgim deri në pesë vjet, nëse bashkëpunojnë me organizata të “padëshiruara” ose ndihmojnë në financimin e tyre brenda territorit të Rusisë./REL
Discussion about this post