Ministri i Drejtësisë, Ulsi Manja, ka reaguar në lidhje me protestën e zhvilluar sot në selinë e PD. Përmes një postimi në rrjetin social Facebook, Manja shkruan se skena që pamë sot nuk ka bërë kurrë vaki në ndonjë vend tjetër të botës. Sipas Manjës është e turpshme dhe e patolerushem që një parti politike të kthehet në arenë lufte.
“S’ka bërë vaki në botë që një parti politike të kthehet në një arenë lufte me mjete mesjetare, mes dy palësh të eksterminuar në skaje të papara ndonjëherë. Policia e Shtetit e ka kaluar me dinjitet të lartë profesional këtë sprovë përballë papërgjegjshmërisë më absurde të të dyja palëve të përfshira në konflikt. Tani që më e keqja ka kaluar më së miri, prokuroria dhe policia duhen mbështetur pa rezervë në kryerjen e detyrës së nxjerrjes para ligjit të përgjegjësve të asaj skene krimi jashtë dhe brenda godinës së këtij ballafaqimi mesjetar”, shkruan ai. Ndërsa i bënë thirrje palëve të vetëpërmbahen dhe të mos pengojnë me veprime ose mosveprime të qëllimshme, organet ligjzbatuese të bëjnë detyrën.
Discussion about this post