Liverpool-i po përgatit një marrëveshje rekord për të siguruar shërbimet e Florian Wirtz.
Me Manchester City dhe Arsenalin të gatshëm të shpenzojnë shuma të mëdha këtë verë për të kapërcyer hendekun, kampionët e Anglisë janë të gatshëm të paguajnë shifra marramendëse për mesfushorin e Bayer Leverkusen, i lindur në vitin 2003, i kërkuar nga gjysma e Europës dhe veçanërisht nga Bayern Munich.
Nuk bëhet fjalë për një operacion të thjeshtë për titujt e gazetave; talenti gjerman mund të luajë në të dy krahët, si trekuartist apo edhe si sulmues.
Sipas “Daily Mail”, do të ishte një sinjal i fortë ai që do të dërgonin Arne Slot dhe drejtori sportiv Richard Hughes te rivalët e Premier League duke realizuar një goditje me “5 yje”, që mund të garantonte një dekadë në nivel të lartë, të ngjashëm me ata të kalibrit të Bellingham dhe Haaland.
Këtë sezon, ai ka shënuar 16 gola dhe ka dhënë 15 asistime me fanellën e Bayer Leverkusen.
Nga Liverpool-i janë të sigurt, tashmë Wirtz është pranë lamtumirës me “Aspirinat”. Sipas tabloidit britanik, Manchester City e ka braktisur pistën në fjalë, edhe Bayerni e ka lëshuar objektivin, aq sa në Bavari mbizotëron zhgënjimi për një lojtar që është ndjekur prej vitesh.
Këtë e dëshmojnë fjalët e presidentit të klubit gjerman, Herbert Hainer, të thëna dje:
“Max Eberl (drejtori sportiv) më informoi se Florian Wirtz me shumë mundësi është i orientuar drejt Liverpool-it”. Një operacion potencial prej 150 milionë eurosh, por “Reds” synojnë ta negociojnë çmimin përmes bonuseve të ndryshme.
Discussion about this post