Me dhjetëra protestues janë ndaluar nga policia ditën e sotme pasi po sulmonin selinë e Partisë Demokratike. Të gjithë të ndaluarit janë shoqëruar për në komisariatin NR.1, ku tashmë ka mbërritur Flamur Noka dhe mbështetës të tjerë të Berishës. Përmes një deklarate për mediat Noka akuzon Ramën se qëndron pas këtyre shoqërimeve dhe i bën thirrje që të ndal lojërat. Sipas tij, protestuesit nuk kanë ushtruar dhunë, por kanë hapur dyert e shtëpisë së tyre.
“Për të vetmin faj sepse ata kanë shkuar, kanë trokitur dhe kanë hapur dyert e shtëpisë së tyre. Ky është faji i vetëm. Edi Ramën i vendosur për të emëruar dhe opozitën, bëri dhunë dhe gjak mbi demokratët, sepse pengu duhet mbajtur aty i burgosur dhe demokratët duhen ndaluar së qenuri opozitë sipas tij. Ka gjë më të dhimbshme sesa kur këta demokratë kanë parë shtëpinë e shndërruar në bunker. Revolta ka bërë që ata të bëjnë gjithçka për të hyrë në shtëpinë e tyre.
Nuk ka Edi Ramë dhe peng që t’i ndalojë të hyjnë në shtëpinë e tyre. Edi Rama sot me veprimin kriminal tentoi të tregonte se është dhe kryeministër dhe kryetar opozite. Demokratët nuk do ta lejojnë. I bëj thirrje të ndalojë lojërat duke arrestuar demokratët që shkojnë në shtëpinë e tyre. Dyert dhe dritaret që kanë gjetur të mbyllura i kanë hapur dhe ky nuk quhet faj. Në Shqipëri nuk mund të ketë demokraci të kontrolluar, nuk mund të ketë opozitë të emëruar. Në Shqipëri opozita nuk pranon që Edi Rama t’i mbaje peng. Pengun ta marrë në Surrel”, tha ai.
Në ditën e sotme protestuesit kanë hyrë me forcë brenda zyrave të PD ku dhe kanë filluar të godasin me gurë dhe tulla personat që ndodheshin në seli. Ndërsa policia ka shoqëruar disa prej tyre të cilët ushtruan dhunë ndaj simpatizantëve të Bashës.
Discussion about this post