Ndeshja me Serbinë, FSHF apel tifozëve

Federata Shqiptare e futbollit ka bërë apel për tifozët që do të jenë prezent në stadiumin kombëtar për sfidën Shqipëri-Serbi.

Përmes disa mesazheve në rrjetet sociale, FSHF kërkon kujdes, ndërsa paralajmëron kontroll të rreptësishëm edhe për sende të ndaluara.

Hyrja bëhet vetëm me biletë personale dhe dokument identiteti, qe do të mbahet gjatë gjithë ndeshjes, teksa nuk do lejohet kalimi në sektorë të tjerë pa lejen e stjuardëve.

Siç edhe në ndeshjet e tjera, nuk do të lejohet futja e objekteve piroteknike dhe sendeve të forta, por edhe flamujve dhe banerave me ofendime raciste.

Mbajtja e tyre është një vepër penale, ashtu siç edhe mbajtja e armëve të zjarrit e të ftohta, por edhe përdorimi i biletave false.

Në rast se diçka e tillë ndodh, përdoruesit do të përballen me pasoja që variojnë nga gjobë deri në arrest me burg.

FSHF tërheq vëmendjen që tifozët do të monitorohen nga kamerat e sigurisë, për të shmangur në këtë mënyrë skenat e pahijshme për një ndeshje futbolli.

Hyrja e tifozëve në stadiumin “Air Albania” pritet të nisë rreth orës 18:00, me takimin që nis në 20:45.