Për të tridhjetë e gjashtën herë me radhë ka dështuar të konstituohet legjislatura e nëntë e Kuvendit të Kosovës.
Tentimi i radhës i Lëvizjes Vetëvendosje për të formuar komisionin për votimin e fshehtë të kryeparlamentarit nuk mori përsëri mbështetjen e partive të tjera politike. Seanca u ndërpre dhe vazhdimi i saj do të bëhet më 25 qershor në orën 11:00.
Mirëpo paraprakisht, kryesuesi i seancës, Avni Dehari uroi komunitetin egjiptian, në kuadër të shënimit të Ditës Memoriale të komunitetit egjiptian, më 24 qershor.
Prezentë në sallën plenare të Kuvendit të Kosovës ishin 99 deputetë, mirëpo vetëm 53 deputetë votuan për votim të Komisionit për votim të fshehtë të kryekuvendarit.
“53 deputetë kanë votuar për, kundër një, asnjë abstenim. Për sot s’ka kuorum. Takohemi sërish me 25 qershor në ora 11:00”, tha kryesuesi i seancës, Avni Dehari.
Konstituimi i Kuvendit në mbi njëzet seanca radhazi nuk ka arritur të ketë kuorum për votimin e komisionit për votimin e fshehtë të kryeparlamentarit.
Në anën tjetër, në gjashtë tentimet e para përmes votimit të hapur, Lëvizja Vetëvendosje nuk ka arritur t’i sigurojë 61 votat e nevojshme për të zgjedhur Albulena Haxhiun kryetare të Kuvendit.
Partitë që deri më tash ishin në opozitë po kërkojnë tjetër kandidat, pasi sipas tyre, Albulena Haxhiu është emër i papranueshëm./KosovaPress/
Discussion about this post