SPAK ka përfunduar hetimet lidhur me abuzimet me tenderat në Universitetin Bujqësor të Tiranës dhe ka marrë të pandehur 28 persona, përfshirë pedagogë, staf akademik dhe biznesmenë.
Sipas Prokurorisë së Posaçme, të pandehurit dyshohen për veprat penale të “shkeljes së barazisë në tendera” dhe “shpërdorimit të detyrës”, në kuadër të procedurave të prokurimeve publike të zhvilluara në këtë institucion arsimor.
Nga hetimet rezulton se në nëntë tendera të zhvilluar gjatë vitit 2022, me vlerë rreth 90 milionë lekë, janë bërë në shkelje që nga faza e përgatitjes së projekteve deri te shpallja e fituesve. Sipas SPAK, pedagogë dhe zyrtarë të universitetit kanë bashkëpunuar me kompanitë “Krijon” shpk, “Zero Group” shpk dhe “Malvina Visoka PF”, të cilat dyshohet se kanë dorëzuar oferta të falsifikuara në emër të subjekteve të tjera, duke ndikuar në fryrjen e fondit limit dhe fitimin e tenderave.
Ndaj 5 personave është caktuar masa “arrest në burg”, përfshirë administratorin e universitetit Edmond Tërthorja, ndërsa 10 të tjerë janë në “arrest shtëpie” dhe pjesa tjetër me masën “detyrim paraqitje”.
Tenderat janë zhvilluar për mallra dhe pajisje që ishin vënë më parë në dispozicion të universitetit, çka ngre dyshime për procedura prokurimi fiktive. Hetimet vazhdojnë për përfshirjen e mundshme të personave të tjerë.
Discussion about this post