I kërkuar nga Italia, kapet në Fier anëtari i një organizate kriminale

Policia ka arrestuar një 20 vjeçar në aksin Fier–Vlorë të shpallur në kërkim ndërkombëtar nga autoritetet italiane

Olsi Kpllanaj akuzohet nga Gjykata e L’Aquilas në Itali për përfshirje në një organizatë kriminale dhe trafik të lëndëve narkotike, vepra për të cilat parashikohet një dënim maksimal prej 24 vitesh burg sipas Kodit Penal italian.

Ndaj tij është caktuar masa e sigurisë “arrest në burg” dhe tashmë ka nisur procedura për ekstradimin drejt Italisë, ku do të përballet me drejtësinë.

Njoftimi: 

Policia e Shtetit/Operacione policore të njëpasnjëshme për kapjen e shtetasve që i fshihen në Shqipëri, akuzave të drejtësisë italiane.

Finalizohet operacioni policor i koduar “Operacionalja 51”.

Operacioni, nga Drejtoria e Forcës së Posaçme Operacionale, për kapjen e pjesëtarit të një organizate kriminale në Itali.

Si rezultat i bashkëpunimit shumë të ngushtë me strukturat e Policisë italiane, të koordinuar nga rrjeti ndërkombëtar ENFAST, shërbimet e Drejtorisë së Forcës së Posaçme Operacionale kapën në aksin rrugor “Fier-Vlorë”, shtetasin e shpallur në kërkim ndërkombëtar, O. K., 20 vjeç, banues në Ballsh.

Gjykata në L’Aquila i ka caktuar këtij shtetasi, masë sigurie “Arrest në burg”, për veprën penale “Trafikimi i lëndëve narkotike”, kryer në kuadër të organizatës kriminale, vepër për të cilën Kodi Penal italian parashikon maksimum dënimi, 24 vjet burgim.

Vijon bashkëpunimi për të finalizuar ekstradimin e 20-vjeçarit, në Itali.