Tirana është shndërruar në një lloj “parajse” për bastet e paligjshme dhe e gjitha ndodh në sytë e punonjësve të Policisë të cilët mundohen të tregojnë se e luftojnë, por realiteti është ndryshe.
Në zonën e “Ali Demit” gjenden një seri lokalesh, të branduara me logon “333” dhe “CR7” dhe pothuajse të gjithë, përveç policisë, e dinë që këto lokale shërbejnë si kamuflim për baste të paligjshme.
Pas shumë ditësh, Lendi Palaj, i njohur si menaxheri fantazmë i lokaleve të basteve “333” dhe “CR7” është arrestuar, pasi u përfshi në një konflikt me armë më 10 qershor në zonën e Ali Demit.
Në njoftimin zyrtar, policia dha vetëm inicialet dhe gaboi vitin e ngjarjes, por burime të sigurta konfirmojnë se bëhet fjalë për Njulend Palajn, i quajtur ndryshe Lendi.
“Specialistët për Hetimin e Krimeve të Komisariatit të Policisë Nr. 1 në bashkëpunim me Komisariatin e Policisë Nr. 3 ndaluan shtetasin e shpallur në kërkim Nj. P., 28 vjeç, pasi Gjykata e Tiranës, i ka caktuar masën e sigurisë “Arrest në burg“, për veprat penale ”Mbajtje pa leje dhe prodhimi i armëve shpërthyese dhe municionit” ,” Prodhim dhe mbajtja, blerja apo shitja pa leje e armëve të ftohta” dhe ”Kanosja”. Ky shtetas u shpall në kërkim me datë 10.06.2024, si i dyshuar i përfshirë në një konflikt në rrugën “Ali Demi”.“- njoftoi policia.
Palaj nuk figuron në QKB me kompani të regjistruara, por konsiderohet “truri” i lokaleve ku lulëzojnë bastet sportive, pavarësisht ndalimit me ligj.
Ngritja e Palajt nisi gjatë fushatës elektorale të vitit 2021, kur ishte aktiv në mbledhjen e votave në Ali Dem në favor të PSD-së së Tom Doshit. Pikërisht aty ndërtoi lidhje të forta me persona kyç të rrjeteve elektorale, të cilat më pas i shfrytëzoi për të organizuar aktivitetin e basteve në mënyrë të strukturuar.
Njerëz pranë Tom Doshit dhe Çim Babasit e ndihmuan financiarisht dhe i garantuan mbrojtje, duke i hapur rrugën për të ndërtuar një rrjet prej 25 deri në 30 lokalesh në kryeqytet. Këto ambiente funksionojnë në pamje të parë si kafene ose pika lojërash, por në të vërtetë ofrojnë baste të paligjshme, me pagesa kesh apo në kriptovaluta, të mbrojtura nga VPN dhe platforma të centralizuara.
Discussion about this post