Kryeministri Edi Rama mbledh degën e Partisë Socialiste në Tiranë, si dhe disa prej deputetëve të qarkut. Mësohet se takimi po zhvillohet në ambientet e një lokali në kryeqytet dhe jo në selinë rozë.
Kujtojmë se sot në mëngjes Kryeministri Edi Rama zhvilloi një vizitë të papritur në Bashkinë e Vlorës, ku mbajti një mbledhje me dyer të mbyllura me drejtuesit lokalë.
Rama u ka kërkuar drejtorëve të bashkisë të paraqesin dorëheqjen, së bashku me disa drejtorë rajonalë.
Sipas të njëjtave burime, Rama ka qenë veçanërisht i ashpër me kryetarin e bashkisë, duke ngritur shqetësimin për furnizimin me ujë të pijshëm dhe menaxhimin e mbetjeve urbane në qytet. Kryeministri ka theksuar se situata është e papranueshme dhe ka kërkuar përgjegjësi të drejtpërdrejtë nga drejtuesit vendorë.
Përveç kësaj, u kërkua largimi i një pjese të administratës së Bashkisë së Vlorës. Rama kritikoi edhe deputetët e qarkut për performancën e tyre të dobët gjatë periudhës së fundi. Po ashtu në degën e PS-së Vlorë u ngjitën emra të rinj.
Ndërsa ditën e djeshme, Kryeministri Rama, nën presionin e tregtarëve njoftoi pezullimin e institucionit AKU.
Ndërkohë në PS-në e Tiranës pritet të ketë shkarkime të njerëzve të afërt të Erion Veliajt. Qysh para arrestimit, ky i fundit u mënjanua nga drejtimi i fushatës.
Takimi, i cili u mbajt në një prej hoteleve të kryeqytetit, ka zgjatur 30 minuta. Në mbledhje kanë qenë të pranishëm deputetët aktualë dhe ata të zgjedhurit e 11 majit, drejtorët e bashkisë Tiranë dhe administratorët e njësive. E pranishme ishte dhe e deleguara në krye të Bashkisë Tiranë, Anuela Ristani, si dhe Ogerta Manastirliu, Ervin Hoxha, Igli Hasani, Albana Koçiu, Endrit Brahimllari, Petrit Malaj, Arbjan Mazniku dhe Blendi Gonxhja.
gijotina.com/
Discussion about this post