Kryetari i PD, Sali Berisha, në një konferencë për media u shpreh se farsa elektorale e 11 majit 2025 përbën një nga plagët më të rënda për demokracinë dhe shtetin ligjor në Shqipëri.
Ai publikoi video skandaloze nga qendra të ndryshme votimi në Bashkinë e Krujës, ku, sipas tij, votohej nën presionin e hapur të policisë politike dhe patronazhistëve, të cilët kontrollonin qytetarët me kamera mbi kokë në kundërshtim flagrant me fshehtësinë e votës.
Berisha theksoi se kjo farsë është rrënja e shumë plagëve që po i rrënojnë shqiptarët: nga zbrazja e vendit, varfëria ekstreme, e deri te dominimi i Shqipërisë nga krimi dhe kartelet e drogës.
“Tani, rikthehemi tek problemi themelor, shkatërrimtar për Shqipërinë dhe shqitparët. Farsa elektorale 11 maj, 2025.
Në themel te shkretimit të Shqipërisë, të përgjysmimit në 10 vite të popullatës së saj. Në themel të rritjes së madhe të varfërisë në këtë vend.
Në themel të dominimit total të Shqipërisë nga kartelet e drogës dhe krimi, qëndron mungesa e votës së lirë të shqiptarëve me një ndërthurje të këtyre faktorëve, ndaj dhe PD është e vendosur të paraqesë para shqiptarëve të gjithë farsën e shëmtuar që ndodhi më 11 maj, me besimin e plotë se, do të jetë një motiv i madh për ta për t’u ngritur dhe rivendosur me çdo çmim dhe me çdo kusht votën e lirë në Shqipëri, për t’u përballur me narkoshtetin.
Sot, këtu kemi video, nga një seri qendrash të Bashkisë së Krujës, ku ju do të shihni se si u votua në këtë bashki, ndërkohë që, policia politike e patronazhistëve kontrollonte në mënyrë anti-ligjore, anti-kushtetuese votën e qytetarëve, ose qytetarët votonin kolektivisht, ose votonin duke patur kamerat mbi kokë, në mënyrë që t’u lexohej vota. Kjo është fshehtësia e votës”, u shpreh Berisha.
Discussion about this post