Kryeministri izraelit Benjamin Netanyahu ka njoftuar se do të dërgojë një ekip negociator në Katar, për të vijuar bisedimet mbi një armëpushim në Gaza, por ka hedhur poshtë kërkesat e fundit të Hamasit, duke i cilësuar si “të papranueshme”.
“Sipas vlerësimit të situatës, Kryeministri Netanyahu ka urdhëruar që ftesa për bisedime të afërta të pranohet dhe që kontaktet për kthimin e pengjeve tona, mbi bazën e propozimit të Katarit, me të cilin Izraeli ka rënë dakord të vijojnë,” thuhet në deklaratën e zyrës së tij.
Netanyahu thekson se ndryshimet që Hamasi kërkon të bëjë në propozimin e Katarit janë të papranueshme për Izraelin. Pavarësisht kësaj, ekipi negociator do të udhëtojë sot, 6 korrik, drejt Katarit për raundin e radhës të negociatave.
Nga ana tjetër, Hamasi ka deklaruar se është gati të nisë menjëherë bisedimet mbi një propozim të propozuar nga SHBA-të për një armëpushim në Gaza.
Presidenti amerikan Donald Trump ka shtuar përpjekjet për t’i dhënë fund luftës 21-mujore në Gaza, ndërsa të hënën, 7 korrik, pritet të zhvillojë një takim vendimtar me Netanyahun në Washington.
Ai ka paralajmëruar një qëndrim të ashpër ndaj liderit izraelit, ndërsa shpreson që marrëveshja e fundit për ndalimin e përplasjes me Iranin t’i hapë rrugë edhe një zgjidhjeje për Gazën.
Discussion about this post