Aksioni për ndërtimet pa leje, banorët e Thethit bllokojnë urën në hyrje të fshatit/ Përplasen me Policinë

Banorët e Thethit I kanë bllokuar urën në hyrje të fshatit Policisë së Shtetit, teksa në terren vijon aksioni për shembjen e ndërtimeve pa leje.

Burime bëjnë me dije se forcat e Policisë për momentin nuk mund të kalojnë për të qenë në mbështetje të IKMT-së gjatë aksionit.

Kujtojmë se dhjetëra banorë të fshatit turistik të Thethit, të cilët kundërshtojnë për shembjen e ndërtimeve pa leje në zonë, janë përplasur pasditen e djeshme me policinë, pasi kërkuan shpjegim për aksionin e IMT-së.

Operacioni i IKMT nisi pas denoncimit të kryeministrit Edi Rama, i cili kritikoi ashpër edhe veprimet e prokurores së Shkodrës, që sipas tij, nuk kishte nisur çështje penale për këto objekte.

Banorët shprehin shqetësimin për pasojat që do të sjellë heqja e objekteve në zhvillimin turistik dhe ekonominë lokale, duke kërkuar një dialog të hapur me autoritetet.

“Na jena këtu, 300 vjet, 400 vjet mor. Derisa ka le Perëndia, dhe pa pas konflikt me kënd…”, tha njëri prej tyre.

“Na nuk jena njerëz kundra ligjit, duam një njeri që drejton në IMT, kush është? Ju lutem të flasim me të. Kaq kërkojmë. Ju jeni punonjës policie, na u kuptojmë se ju s’na keni asnjë lloj borxhi.”

Policët në terren u përpoqën t’i largojnë banorët e Thethit që janë duke protestuar, teksa një prej efektivëve dëgjohet duke thirrur me zë të lartë: “Jashtë objektit të tan, shpejt”.

Nuk kanë munguar as momentet e tensionit deri në kufijtë e përplasjes fizike mes disa banorëve dhe efektivëve të policisë.

“Nuk kapet ashtu siç kap ti mor burrë, se jena në pronën tone, mor burrë”, i është drejtuar një banor, njërit prej policëve, i cili prej krahu kërkonte ta largonte nga objekti ku mjetet e rënda të IMT-së janë duke kryer shembjen.

“Unë jam në vendin tim, në shtëpinë time mor burrë. Këtu e kena shtëpinë, tan fshati, këtu”, ia ktheu qytetari pas një tentative të radhës të efektivit për ta larguar me forcë.

Lexo edhe: