Ndërtimet pa leje në Theth, shkarkohen nga detyra gjithë drejtuesit e policisë së Shkodrës

Drejtori i Përgjithshëm i Policisë së Shtetit, Ilir Proda, përmes një deklarate për mediat, njoftoi shkarkimin nga detyra të drejtorit të Policisë së Shkodrës, Fatmir Lleshaj, si dhe shefit të komisariatit.

Shkak për marrjen e këtyre vendimeve janë bërë ndërtimet pa leje të konstatuara në fshatin turistik të Thethit, ku ditët e fundit IKMT ka ndërmarrë një aksion për shembjen e tyre, ku janë përballur me kundështinë e banorëve.

Veç kryepolicit të Shkodrës, Fatmir Lleshaj, nga detyra është shkarkuar edhe shefi i komisariatit, Nik Nikolla, ndërsa shefi i stacionit të Policisë së Thethit është pezulluar nga detyra, ku për të ka nisur edhe hetim.

Ilir Proda, gjatë deklaratës për mediat, teksa njoftoi shkarkimet, paralajmëroi edhe drejtuesit e qarqeve të tjera që do të mbajnë përgjegjësi nëse konstatohen shkelje.

“Do mbajnë përgjegjësi nëse mbajnë sytë mbyllur dhe nuk e konstatojnë vetë. Para se ta konstatoni unë ju, apo para se ta ketë konstatuar i gjithë komuniteti. Çdo rast neglizhimi, ta denoncojnë në policinë e Shtetit”, tha Proda.