Shqipëria në flakë, 37 vatra zjarri në 24 orët e fundit, situata kritike në disa zona

Gjatë 24 orëve të fundit, Shqipëria është përballur me një numër të lartë zjarresh, duke regjistruar 37 vatra në total në të gjithë vendin. Sipas raportimit të Agjencisë së Mbrojtjes Civile, nga këto, 4 vatra zjarri janë ende aktive, ndërsa 2 të tjera po monitorohen me kujdes.

Zjarret janë shpërthyer në disa bashki të vendit, duke përfshirë Dibër, Vlorë, Selenicë, Sarandë, Himarë, Vau i Dejës, Korçë, Lezhë, Durrës, Rrogozhinë, Vorë, Tiranë, Kamëz, Cërrik, Belsh, Roskovec, Lushnjë, Skrapar, Poliçan, Përmet dhe Memaliaj.

Aktualisht, vatrat aktive janë përqendruar në:

• Qarku Dibër: Në zonën e “Livadhit të Peladhisë” në Bulqizë, zjarri me intensitet të ulët po mbahet nën kontroll nga forcat zjarrfikëse, shërbimi pyjor dhe vullnetarët. Në “Liqenin e Luleve” në Parkun Kombëtar Lurë, vazhdojnë përpjekjet për shuarjen e plotë të zjarrit që ka prekur një sipërfaqe pyjore me pisha dhe livadh, me angazhimin e forcave të shumta, përfshirë ushtrinë.
• Qarku Tiranë: Në fshatin Zambish të Rrogozhinës, një zjarr në një sipërfaqe me dushqe është ende aktiv dhe po punohet për shuarjen e tij. Gjithashtu, në fshatin Rrostej, po në Rrogozhinë, një zjarr në shkurre dhe ferra është nën kontroll, por ende nuk është shuar plotësisht për shkak të terrenit të vështirë.

Vatrat në monitorim përfshijnë:

• Qarku Gjirokastër: Në fshatin Piskovë të Përmetit, një vatër e vogël në vendgrumbullimin e mbeturinave po digjet në brendësi pa rrezik përhapjeje.
• Qarku Vlorë: Në zonën e “Sotiranit” midis Tragjasit dhe Dukatit në Orikum, situata po monitorohet për shkak të pranisë së tymit në një sipërfaqe me shkurre, ferra dhe pyll pishe, ku zjarri ka rënë më herët.

Raporti ditor i Agjencisë së Mbrojtjes Civile thekson edhe incidente të veçanta si një zjarr në një banesë në Tiranë dhe dy zjarre në magazina në Kamëz dhe Roskovec.

Si pasojë e këtyre zjarreve, kryesisht në sipërfaqe me pemë, shkurre dhe barishte, janë djegur rreth 52 hektarë bimësi. Në operacionet e shuarjes janë angazhuar 65 automjete zjarrfikëse dhe 547 forca, si dhe 52 efektivë të Forcave të Armatosura me 2 automjete zjarrfikëse gjatë ditës së djeshme.

Bazuar në parashikimet e Institutit të Gjeoshkencave, sot priten reshje të pakta lokale në Shkodër, Kukës, Elbasan dhe Vlorë, ndërsa rreziku i zjarreve mbetet i lartë në Durrës, Tiranë, Fier dhe Vlorë, i moderuar në Lezhë, Elbasan, Berat, Korçë dhe Gjirokastër, dhe i ulët në Shkodër, Kukës dhe Dibër.