Një deklaratë e pazakontë dhe krejtësisht e paprecedentë ka ardhur nga Presidenti i Komitetit Olimpik Kombëtar Shqiptar, Fidel Ylli, gjatë një interviste televizive në ABC News në emisionin ”Botërori i vogël” me gazetarin Maks Tashi, ku sulmoi publikisht Gjykatën e Arbitrazhit për Sport në Lozanë (CAS), institucionin më të lartë dhe të njohur ndërkombëtarisht për zgjidhjen e mosmarrëveshjeve sportive.
I pyetur për përplasjet me Federatën Shqiptare të Futbollit, pas vendimit të Asamblesë së Përgjithshme të FSHF për të pezulluar çdo marrëdhënie juridike me KOKSH, Fidel Ylli tentoi të relativizojë dhe delegjitimojë rolin e CAS-it, i cili në janar 2024 rrëzoi vendimet e paligjshme të Asamblesë së Jashtëzakonshme të KOKSH të mbajtur më 10 janar 2021, përfshirë edhe mënyrën se si ai vetë u zgjodh President.
Në një deklaratë që ngjalli habi dhe reagime në komunitetin sportiv dhe juridik, Fidel Ylli tha ndër të tjera:
“Është një gabim fatal që ai gjyqtar ka bërë. Duhet të kuptojmë që, të jesh gjyqtar në Gjykatën e Tiranës, të Apelit apo të Lartë, duhet të kesh eksperiencë, duhet të kesh mbaruar magjistraturën, të kesh kujdes nga opinioni publik, nga ju gazetarët, nga Inspektori i Lartë i Drejtësisë. Gjykata e Lozanës nuk ka fare gjyqtarë të tillë. Ky që ka gjykuar këtë çështje mund të jetë një biznesmen dhe Danimarka e ka çuar atë si një avokat për të gjykuar. Shqipëria ka të drejtë të dërgojë dy gjyqtarë në Lozanë, që të gjykojnë çështjet e Danimarkës dhe shteteve të tjera. Vetëm çështjet e Shqipërisë nuk mund t’i gjykojnë. Dhe ai është i një shteti tjetër, por nuk është gjyqtar i nivelit si gjykatat tona, që janë magjistratë, që kanë Inspektoriatin e Drejtësisë, që kanë KLGJ-në, që kanë median, që kanë opinionin publik që thotë si e dhe këtë vendim”.
Një deklaratë e tillë nuk vendos aq në dyshim profesionalizmin e arbitrave të CAS, sa shpërfaq në mënyre të pandërgjegjshme problemin e vërtetë që Presidenti i KOKSH ka me një gjykate të pavarur si CAS: asaj nuk mund t’i behet presion nëpërmjet KLGJ, ILD apo instrumentave të tjerë që përdoren zakonisht në mjedisin shqiptar për t’i bërë presion drejtësisë.
Discussion about this post