Deputetët e Partisë Demokratike të qarkut Shkodër, Luçiano Boçi dhe Bardh Spahia, janë përplasur me efektivët e policisë në Theth, ku kishin shkuar për të mbështetur banorët që kundërshtojnë prishjen e ndërtimeve në fshat.
Në një video të publikuar në llogarinë e Boçit në Facebook, shihet teksa deputeti i zgjedhur demokrat përleshet edhe me një person, i cili prezantohet se është drejtori i Policisë së Shkodrës, Fatmir Lleshaj. “Çfarë drejtori je ti? Ku e ke bexhin”, dëgjohet t’i thotë Boçi.
“Mos më kap me dorë se ta mbështjell mirë, legen m….”, i tha deputeti i zgjedhur një tjetër efektivi. “E mendove mirë që më preke?”. “O trim hajde një minutë”, i tha Boçi, Lleshajt.
Gjithashtu është regjistruar edhe një incident skandaloz, ku një banor invalid, i cili i ka këmbët e prera ka tentuar të çajë koordonin policor, por është përballur me dhunën në grup të efektivëve.
Sipas Boçit, qytetarët kanë ndërtuar shtëpitë në pronën e tyre me të drejtë, por kjo nuk përputhet me interesat e Edi Ramës, i cili, sipas tij, po kërkon të rrëmbejë edhe këtë perlë të Shqipërisë, ashtu siç ka rrëmbyer bregdetin dhe vende të tjera me bukuri natyrore, duke i dhënë ato klientëve të tij.
Ai shton se po përdoret e njëjta formulë si në raste të tjera, me paketën e emaleve dhe ligjin e investimeve strategjike, i cili është pezulluar përkohësisht në hetim. Boçi shprehet se në Shqipëri nuk ka shtet, por terror të një regjimi që shkel të drejtat e pronarëve legjitimë të tokës, duke i marrë zvarrë për turizmin familjar që ata kanë ndërtuar dhe për të cilin duhet falënderuar.
Ai akuzon punonjësit e policisë dhe IKMT-së se veprojnë vetëm me urdhër, pa asnjë dokumentacion, dhe denoncon se këtu sundon një njeri që jep urdhra për prishje, për largimin e drejtorëve të bashkive pa detyra dhe për veprime kriminale.
Boçi:
Jam i revoltuar dhe në mbrojtje të qytetarëve, jo i acaruar, sepse të acaruar janë policët, janë drejtuesit, janë edhe shkelje të ligjit, janë në një veprim terrori, në një lloj masakre që prej ditësh është instaluar këtu në Theth.
Masakër që drejtohet ndaj qytetarëve, por masakër që drejtohet edhe ndaj turizmit, turizmit familjar i cili ka marrë goditjen finale, përfundimtare.
Dhe siç e shihni, prishjet këtu janë selektive, ju i keni parë, i keni transmetuar dhe policia dhe IKMT janë edhe kundërshtim të plotë me ligjin, ndërkohë që janë ekzekutuesit që duhet të kishin mbrojtur nëse ka një mbrojtje të territorit.
Këtu nuk ka nevojë për mbrojtje, qytetarët kanë ndërtuar shtupiza në territorin e tyre, në pronën e tyre, me të drejtën e tyre, por kjo nuk përputhet me interesin e Edi Ramës, i cili duke goditur qytetarët, kërkon të rrëmbejë edhe këtë perlë të Shqipërisë, sikurse ka rrëmbyer perlën e tjera, bregdetin, vende me bukuri përrallore natyrore, ja i dha klientëve të tij.
Të njëjtën formulë e përdori edhe këtu, paketa e ka bërë gati, është ajo ‘paketa e maleve’ bashkë me ligjin e investimeve strategjike që u shty në hetimin e tij.
Këtu nuk ka shtet, ky është terror i një regjimi, të marrësh zvarrë një pronar legjitim në pronën e vet, se ka bërë turizëm familjar, që duhet falënderuar për këtë, kjo është kriminale, është veprim kriminal që vjen me urdhër.
Të gjithë punonjësit e policisë, e IKMT na kanë thënë këtë, që kemi urdhër, dhe nuk paraqesin asnjë lloj shkrese, nuk e di me bazën e kujt urdhrash veprojnë, sepse këtu vepron dhe sundon vetë një njeri, jep urdhër për prishje, jep urdhër për largimin e drejtorëve të bashkisë pa detyra, jep urdhër për bandat.
Discussion about this post