Protesta e 8 janarit/ Prokuroria vijon hetimet ndaj 34 të arrestuarve, ja akuzat e ngritura

Prokuroria e Tiranës ka bërë njoftimin zyrtar lidhur me protestën e dhunshme të zhvilluar dy ditë më parë në selinë e Partisë Demokratike. Organi i akuzës bën me dije aktualisht po sekuestrohen të gjitha pamjet filmike në ambientet me vlerë hetimore dhe po merren në pyetje të gjithë personat e përfshirë.

Ndërkohë ndaj 34 të arrestuarve, prokuroria bën me dije se janë ngritur 4 pista hetimi duke nisur nga dhuna e ushtruar nga protestuesit në drejtim të selisë së PD-së deri tek mbajtja e sendeve të ndryshme të paligjshme dhe individualizimi i autorëve.

“Prokuroria e Rrethit Gjyqësor Tiranë po kryen hetime për çështjen penale me Nr. 182 të vitit 2022, për ngjarjen e datës 08.01.2022, të ndodhur në selinë e Partisë Demokratike.

Nga veprimet e para hetimore të kryera rezultojnë të jenë arrestuar 34 persona, të dyshuar për vepra penale të ndryshme si “Shkatërrim prone” sipas nenit 150 të Kodit Penal, “Prishja e qetësisë publike” sipas nenit 274 i Kodit Penal, “Shkelja e rregullave mbi lëndët plasëse, djegëse dhe radioaktive” sipas nenit 282 te Kodit Penal, “Mbajtja pa leje dhe prodhimi i armëve, armëve shpërthyese dhe i municionit” sipas nenit 278 i Kodit Penal dhe “Prodhimi, mbajtja, blerja apo shitja pa leje e armëve të ftohta” sipas nenit 279 i Kodit Penal” – thuhet në njoftimin e Prokurorisë.

Në njoftim gjithashtu tregohet se deri më tani jenë ngritur disa pista hetimi si:

– dhuna e ushtruar nga protestuesit në drejtim të selisë së PD-së dhe pasojat e ardhura si
shkatërrim prone,

– përdorimi i lëndëve të panjohura në drejtim të protestuesve para ndërhyrjes së policisë dhe dhuna e ushtruar në drejtim të tyre,

– mbajtja e sendeve të ndryshme të paligjshme dhe individualizimi i autorëve,

– si dhe çdo e dhënë tjetër e pretenduar deri në këtë fazë.

Hetimet vijojnë në mënyrë intensive në drejtim të marrjes së të dhënave me vlerë hetimore.
Po kryhen të gjitha veprimet si:

– sekuestrimet e pamjeve filmike në të gjitha ambientet me vlerë hetimore,

– marrja në pyetje e të gjithë personave që kanë dijeni për rrethanat e ngjarjes,

– si dhe çdo lloj veprimi tjetër që do dalë i nevojshëm nga dinamika në vijim.

Prokuroria e Rrethit Gjyqësor Tiranë, është e angazhuar maksimalisht për kryerjen e hetimeve me objektivitet si në çdo rast, me qëllim zbardhjen e plotë të rrethanave të ngjarjes dhe vënien para përgjegjësisë penale të çdo personi që ka kryer veprime në kundërshtim me ligjin.