Alen Sherri i ka dhënë lamtumirën Kaljarit gjatë merkatos së verës, duke u bërë tashmë pjesë e skuadrës së Frozinones, e cila luan në Serinë B. Portieri i Kombëtares shqiptare ka pranuar që të zbresë një kategori më poshtë, por me idenë e qartë që të luajë titullar në radhët e këtij klubi.
Kontrata e Sherrit është e veçantë, edhe pse ai ka kaluar parimisht me formulën e huazimit te Frozinone. Ky klub ka klauzolën e blerjes së kartonit të tij për rreth 1 milion euro në fund të këtij sezoni.
Megjithatë, në kontratë ka edhe një kundër-klauzolë nga ana e Kaljarit. Mediat italiane kanë mësuar se klubi i Sardenjës, ka vendosur klauzolën që në rast se Frozinone blen Sherrin dhe ata duan ta kthejnë përsëri në bazë, mund ta bëjnë një gjë të tillë nëpërmjet pagesës së një shifre.
Përtej Adriatikut bëjnë të qartë se shifra në fjalë e vendosur në marrëveshje, është më shumë se 2 milionë euro që Kaljari do të shpenzonte për ta blerë për herë të dytë, pasi ia kishte dalë ta blinte për herë të parë nga Egnatia në verën e vitit 2024.
gijotina.com/
Discussion about this post