Shqipëria vijon të përballet me një situatë të rënduar zjarresh në të gjithë vendin. Gjatë 24 orëve të fundit janë raportuar 24 vatra të reja zjarri, nga të cilat 4 janë ende aktive dhe po kërkojnë angazhim maksimal të forcave operacionale.
Vatrat e zjarrit janë evidentuar në një gamë të gjerë bashkish, duke përfshirë: Dibër, Bulqizë, Vau i Dejës, Shkodër, Malësi e Madhe, Pukë, Mallakastër, Fier, Selenicë, Finiq, Himarë, Kolonjë, Korçë, Përmet, Dimal, Elbasan, Peqin, Gramsh, Librazhd, Tiranë, Kavajë dhe Kamëz.
Aktualisht, vatrat aktive janë si më poshtë:
- Qarku Dibër – Parku Kombëtar Lurë: Në zonën e quajtur “Liqeni i Luleve”, dy vatra janë ende aktive. Njëra ndodhet në krahun e Gurë Lurës, ndërsa zona tjetër afër kanalit të ujit të HEC-it konsiderohet e izoluar dhe është nën monitorim. Vatra e dytë, në krahun e Malit të Dejës, është e përhapur dhe ndihmuar nga era, duke u zgjeruar drejt territorit të bashkisë Mat.
- Qarku Dibër – Bashkia Bulqizë: Në zonën e “Malit të Peladhisë”, njësia administrative Zerqan, vijon puna për shuarjen e një vatre të riaktivizuar. Deri tani janë përfshirë rreth 32 hektarë me shkurre dhe barishte. Zjarri është aktiv vetëm në një vatër mbi fshatin Vlash, që po monitorohet nga forcat operacionale.
- Qarku Fier – Bashkitë Mallakastër dhe Fier: Vatra e zjarrit në zonën Drenovë–Gorishovë, njësitë Qendër Dukas dhe Cakran, vijon të jetë aktive. Për shkak të terrenit të thyer, erës së fortë dhe përhapjes së shpejtë të flakëve, kontrolli i situatës ka qenë i vështirë. Aktualisht zjarri vazhdon me intensitet në zonat me ullishte të fshatit Gorishovë.
- Qarku Vlorë – Bashkia Himarë: Në fshatin Borsh, njësia administrative Lukovë, ka rënë zjarr në një sipërfaqe pyjore. Ndërhyrja vazhdoi deri në orët e vona të mbrëmjes, por pa mundur izolimin e plotë të vatrës. Operacioni për shuarjen po vijon edhe sot, me mbështetjen e forcave të Forcave të Armatosura.
Si pasojë e zjarreve janë djegur mbi 154 hektarë me shkurre dhe bimësi, si dhe më shumë se 3,000 rrënjë ullinj, duke shkaktuar dëme të konsiderueshme mjedisore dhe ekonomike.
Në operacionet e shuarjes së zjarreve janë angazhuar 57 automjete zjarrfikëse dhe 538 forca operacionale. Gjithashtu, gjatë ditës së djeshme, janë përfshirë edhe 2 helikopterë, 5 automjete zjarrfikëse dhe 120 efektivë nga Forcat e Armatosura. Sot, që prej orës 06:00, në terren ndodhen 50 trupa ushtarake dhe 5 automjete zjarrfikëse me personel mbështetës.
Sipas Institutit të Gjeoshkencave, për ditën e sotme nuk parashikohen reshje. Sa i përket rrezikut për zjarre në pyje, niveli “I LARTË” pritet në qarqet: Tiranë, Elbasan, Fier, Berat, Korçë dhe Gjirokastër, ndërsa niveli “I MODERUAR” në qarqet e tjera.
Autoritetet u bëjnë thirrje të gjithë qytetarëve që të shmangin çdo veprim që mund të shkaktojë zjarr dhe të njoftojnë menjëherë shërbimet emergjente në rast se konstatojnë një vatër zjarri.
Discussion about this post