Kryeministri Edi Rama ka vazhduar ditën e sotme me retorikën e tij të zakonshme, duke shpalosur premtime të radhës rreth Inteligjencës Artificiale gjatë një takimi me përfaqësues të teknologjisë, biznesit dhe start-up-eve. Ndërsa vendi përballet me sfida të thella ekonomike, sociale dhe institucionale, kryeministri zgjedh të flasë për ministra dhe kryeministra me AI, duke lënë pas një shije të hidhur dhe një pyetje thelbësore: A është ky një vizion i vërtetë për të ardhmen, apo thjesht një manovër për të shmangur përgjegjësitë e së tashmes?
Edi Rama, pa caktuar asnjë afat kohor konkret, u premtoi përfaqësuesve të sektorit se ministrin e Shtetit për Inteligjencën Artificiale do ta zgjedhin vetë ata. Më tej, ai shpalosi vizionin e “Shqipërisë 2030 me AI”, duke kërkuar një draft-program për ta çuar në parlament dhe për ta kthyer në program pune të qeverisë. Kulmi i kësaj retorike arriti kur kreu i qeverisë shtoi se do të jetë “arritje historike” të krijojnë ministra dhe kryeministër me AI, ku, sipas tij, “ata do të punojnë, ndërsa ne do të bëjmë muhabet”. Madje, u premtua edhe ndërtimi i një muzeu tërësisht me AI.
Këto deklarata, ndonëse mund të tingëllojnë futuriste dhe progresive në një kontekst global, në realitetin shqiptar marrin përmasa qesharake. Në një vend ku qytetarët luftojnë me rritjen e çmimeve, mungesën e shërbimeve bazë, një shëndetësi të sëmurë, korrupsionin e thellë, një sistem drejtësie shpeshherë të paaftë dhe të tjera probleme që nuk po i rendisim për arsye hapësire të pamjaftueshme, të flasësh për qeveri me AI duket si një shaka e hidhur.
Kjo nuk është hera e parë që Kryeministri bën premtime të mëdha teknologjike, të cilat mbeten në letër, apo edhe nëse realizohen rezultojnë dështim. Shembulli: Satelitët Albania 1 ddhe 2. Ajo që dihen është vetëm fatura e kripur e shpenzuar nga paratë e taksapaguesve. Rezultati? Mister!
Stelitët dhe dronët, sic pat premtuar më herët kreu i qeverisë, do sillnin rezultate në kontrollin e territorit dhe eliminimin e inspektorëve. Por, inspektor Muci që kerkon faturë për rigonin është ende vërdallë dhe vendi përballet me ndërtime pa leje, zaptim të trotuareve publike dhe një situatë kaotike në menaxhimin e pronës. Kreu i qeverisë ndërkohë, pas më shumë se 1 dekade në pushtet, vijon të anashkalojë problemet rrënjësore të zbatimit të ligjit e llogaridhënien dhe flet për .. qiqra në hell!
Pra, në një kohë kur Shqipëria ka nevojë për zgjidhje konkrete për problemet e përditshme të qytetarëve, premtimet për “Shqipërinë 2030 me AI” dhe qeveritarë robotë duken në rastin më të mirë si një përpjekje për të shkëputur vëmendjen nga realiteti i vështirë, ose një tallje që kreu i qeverisë në kulmin e pushtetit, bën me elektoratin.
Discussion about this post