Iu kontrollua banesa dhe iu sekuestrua celulari, Ergys Agasi paraqitet në SPAK

Biznesmeni Ergys Agasi është paraqitur këtë të martë në SPAK, ndërsa ende nuk dihen arsyet e thirrjes së tij në Prokurorinë e Posaçme.

Më herët në kuadër të një hetimi të nisur nga Prokuroria e Posaçme, biznesmenit më 19 qershor iu kontrollua banesa si dhe iu sekustrua telefoni celular.

Agasi konfirmoi për mediat kontrollet e ushtruar duke shpjeguar se Gjykata e Posaçme i kishte miratuar pas dyshimeve bazuar në indicie të arsyeshme që prokuroria kishte ngritur për implikimin e tij në kontrabandën e cigareve, lidhur me fabrikën e zbuluar në Librazhd.

“Në mëngjes më kanë ardhur agjentët dhe më është bërë me dije se ishin miratuar kontrolle në bizneset e mia, për shkak të një hetimi që lidhej me kontrabandën e cigareve. Kam qenë i gatshëm të bashkëpunoj pa asnjë hezitim.” – tha Agasi.

Edhe ish-kryeministri, Sali Berisha ka hedhur akuza ndaj biznesmenit për lidhje me grupet kriminale.