Tre largime zyrtare në më pak se 24 orë kanë ndodhur nga “Nisma Thurje” pas përplasjes mes Adriatik Lapajt dhe Endrit Shabanit, ku hodhën akuza të forta ndaj njëri-tjetrit, për shkak se kush do e merrte mandatin e vetëm të fituar nga “Nisma Shqipëria Bëhet” në zgjedhjet parlamentare të 11 Majit.
I fundit që ka njoftuar largimin është drejtuesi i “Nismës Thurje” në Qarkun e Korçës, Klajdi Pllaha, i cili bën me dije se si anëtar i Këshillit Bashkiak në Korçë do të vijojë të jetë i pavarur. Sipas tij, ngjarjet e zgjedhjeve të fundit treguan se idealizmi është humbur nga partia “Nisma Thurje” nga egoja personale apo papjekuria politike.
Pllaha shton më tej se gjatë gjithë kohës nuk është ndjerë i përfshirë në vendimmarrjen e partisë, ndaj ka qenë gjithmonë më afër qytetarëve të Korçës sesa vetë partisë. Ai thotë se të gjithë ata që e kanë votëbesuar, ia kanë dhënë besimin Klajdit dhe jo partisë.
Nga “Nisma Thurje” u larguan edhe Pano Soko e Rigerta Loku, ku duket se tashmë në këtë forcë politike ka mbetur vetëm Endrit Shabani dhe daja i tij, Zeqir Kordhoni.
Reagimi i Pllahas
Një mik i mençur më pati thënë dikur: “Për të njëjtën arsye pse hyn në një parti, për të njëjtën edhe del prej saj.”
Në vitin 2021, kur u angazhova për herë të parë me Nismën Thurje, e njihja pak, por hyra me idealizëm, sepse besoja në pastërtinë e të rinjve që donin të ndryshonin sistemin. E përfaqësova në tri palë zgjedhje, duke rritur rezultatin dhe duke u pjekur politikisht, pa humbur idealizmin dhe pastërtinë.
Tani ka ardhur momenti të shkëputem nga kjo lëvizje, sepse ngjarjet e zgjedhjeve të fundit treguan se ky idealizëm është humbur në këtë parti, ose në rastin më të mirë është vënë në hije nga egoja personale apo papjekuria politike. Mbase një ditë do të ndodhë një reflektim i thellë dhe i sinqertë nga dy drejtuesit e koalicionit, por për momentin, unë nuk mund ta përfaqësoj më Nismën Thurje.
Megjithatë, nuk pendohem për këto pesë vite angazhim. Së pari, sepse më kanë bërë të njoh të rinj të tjerë idealistë, që fatkeqësisht, njëri pas tjetrit, janë larguar nga Nisma. Së dyti, gjatë gjithë kohës nuk jam ndjerë i përfshirë në vendimmarrjen e partisë, ndaj kam qenë gjithmonë më afër qytetarëve të Korçës sesa vetë partisë. Dhe jam i sigurt që të gjithë ata që më kanë votëbesuar, ia kanë dhënë besimin Klajdit, jo partisë.
Angazhimi im politik do të vazhdojë, ashtu si në dy vitet e fundit në Këshillin Bashkiak, për të qenë zëri i qytetarëve korçarë – tashmë dhe zyrtarisht si i pavarur, ashtu siç jam ndjerë gjithmonë.
Dhe, pavarësisht gjithçkaje, unë mbetem pozitiv, duke besuar se të rinj idealistë dhe me karakter nuk do t’i mungojnë kurrë Shqipërisë, madje as politikës. Ndërkohë, le të vazhdojmë të forcojmë zërin qytetar.
Discussion about this post