Historia e Agim Trocit që u dogj gjatë aksionit për shuarjen e zjarrit në fshatin Kalasë, nuk njihet nga të gjithë, përvecse nga dëshmitarët që kanë parë sot aktin e tij të pashembullt e frymëzues për të shpëtuar dhjetëra persona në rrezik nga zjarri.
Sipas personave që kanë qenë në vendngjarje, mësohet se shefi i komisariatit të Delvinës Agim Troci dhe shefi i krimeve Joni Lame ishin pjesë e ekipit të punonjësve që prej 2 ditësh po luftojnë të shuajnë zjarret në Kalasë, por që sot dolën jashtë kontrollit.
E teksa zjarrëfikëset punonin me intensitet në terren, një banesë po digjej dhe brenda saj njerëz të pambrojtur, fëmijë e të moshuar që kërkonin ndihmë.
Komisar Troci, babai i 2 fëmijëve të mitur nuk u mendua 2 herë por u fut në banesë bashkë me kolegun e tij dhe nxorrën prej andej një fëmi dhe gjyshen e tij.
Pasi nxorri jashtë shtëpisë, 2 personat të cilët i mbajti në kurriz, Troci u fut mes flakëve të shihte nëse kishte të tjerë persona që mund të kishin mbetur në banesë.
Por, u rrethua vetë nga flakët duke marrë disa plagë. Komisar Agim Troci nuk u spras por vijoi të kërkojë e të nxjerrë prej banesës të gjithë personat e mbetur brenda, ndonëse me plagë në trup. Ndërsa shefi i krimeve u asfiksua nga tymi.
Megjithatë, Agimi nuk preferoi të flasë për ngjarjen. Ai u transportua me helikopter drejt Tiranës dhe po trajtohet për plagë të shumta që ka marrë në bark, krahë dhe këmbë, në pavionin e djegieve në QSUT.
Ka qenë vetë drejtori i policisë së Shtetit Ilir Proda i cili ka përmendur sakrificën e tij, gjatë vizitës në pavionin e djegieve në QSUT, ku Agim Troci po merr ndihmë të specializuar.
“Shefi i Komisariatit Agim Troci është shembulli më i mirë i përkushtimit dhe sakrificës që mishëron një oficer i Policisë së Shtetit.
Ai veproi me guxim dhe ndjenjë të lartë përgjegjësie, për të mbrojtur jetën e të tjerëve.
Dua të falënderoj të gjithë, përfshirë Nënkomisar Eridionin, i cili ka pësuar asfiksi dhe po merr ndihmë mjekësore në Spitalin e Delvinës, si dhe gjithë punonjësit e Komisariatit të Policisë Delvinë që, nën drejtimin e Komisar Trocit, me përkushtim dhe guxim, mbështetur dhe nga shërbimet e Komisariatit të Policisë Sarandë, kanë shpëtuar dhjetëra jetë qytetarësh, duke bërë të mundur evakuimin nga banesat e tyre deri jashtë zonës së rrezikut.
Ky akt është një shembull frymëzues i përkushtimit dhe humanizmit të efektivëve në krye të detyrës”, tha Proda.
Agim Troci e kolegët e tij, kanë bërë krenar sot jo vetëm familjet e tyre, por të gjithë ne si shoqëri.
Vizita e Presidentit Begaj
Presidenti i Republikës, Bajram Begaj, vizitoi mbrëmjen e sotme në urgjencën e QSUT-së shefin e Komisariatit të Delvinës, komisar Agim Troci, i cili pësoi djegie në bark, krah dhe këmbë gjatë përpjekjeve për të ndihmuar në shuarjen e një zjarri në zonën e Senicës, Delvinë.
Presidenti vlerësoi aktin e guximshëm dhe përkushtimin e komisar Trocit dhe dha një mesazh ndërgjegjësues për qytetarët:
“Vlerësoj maksimalisht angazhimin e forcave zjarrfikëse, emergjencave civile, forcave të armatosura dhe pushtetit vendor në përballimin e kësaj situate të vështirë me temperatura shumë të larta.
Ftoj qytetarët të tregojnë kujdes dhe përgjegjësi – parandalimi fillon nga secili prej nesh. Bashkëpunimi dhe kontributi me këto struktura është thelbësor për sigurinë e jetës dhe të pronës.
Çdo akt zjarrvënieje është i dënueshëm dhe sjell pasoja të rënda për jetën dhe pasurinë.”
gijotina.com/
Discussion about this post