Mesjava e Kupave të Europës niste për klubet e Kategorisë Superiore me ankthin e madh të rezultateve që duhej të arrinin me çdo kusht, për të ndaluar rënien e kampionatit shqiptar në renditjen e UEFA-s, teksa shtohej rreziku për të humbur një skuadër në kompeticionet europiane.
Për fat të mirë, me radhë erdhën fitoret e Dinamos, Vllaznisë dhe Egnatias, të cilat regjistruan rezultate të rëndësishme për kualifikimin e mëtejshëm të tyre në Ligën e Konferencës, por edhe për të ndihmuar kampionatin shqiptar. Tre fitoret e skuadrave, bënë të mundur që Shqipëria të largohej përsëri në renditjen e UEFA-s nga zona e ftohtë.
E sikur të mos mjaftonte kjo, të kthehej në një nga kampionatet që ka siguruar më shumë pikë deri tani në rang sezonal në klasifikimin e UEFA-s. Rezulton se deri tani, Shqipëria është në vendin e 6 për edicionin 2025-2026 në klasifikimin e UEFA-s, me 1,375 pikë të mbledhura nga skuadrat e saj.
Kampionati shqiptar kalohet nga ai i Bjellorusisë, Andorrës, Suedisë, Maqedonisë së Veriut dhe Islandës, si të vetmit që kanë marrë pikë më shumë deri tani. Fakti që Dinamo, Vllaznia dhe Egnatia fituan përkatësisht ndaj skuadrave të Andorrës, Islandës dhe Bjellorusisë, lë të mendosh se në rast përsëritje të rezultateve edhe në ndeshjet e dyta, kampionati shqiptar do të mund të bëjë hapa të tjerë para në këtë renditje sezonale. Dhe paralelisht, t’i largohet edhe rrezikut gjithmonë prezent për të humbur një ekip në kompeticionet europiane.
gijotina.com/
Discussion about this post