Pasi doli nga burgu, ish-kryebashkiaku i Kukësit rehabilitohet nga “Rilindja”. Blendi Gonxhe i bën peshqesh Safet Gjicit tenderin e rikonstruksionit të Spitalit të Pogradecit. Kompania e tij, tashmë e menaxhuar nga i vëllai, sapo ka marrë afro 3 miliardë lekë me një procedurë të dyshimtë nga Operatori i Blerjeve të Përqendruara që varet nga Blendi Gonxhe dhe administrohet nga Arlinda Poga.
“Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, këtë klasifikim i ka bërë tenderit Open Data Albania. Për shkeljet e kryera procedura shënohet me “Flamur të kuq” që është shenja e riskut të korrupsionit.
Bëhet fjalë për tenderin me objekt “Rikonstruksion i godinës Qendrore Spitali Pogradec” me fond limit 292,017,842.53 lek pa TVSH.
Fiton oferta më e shtrenjtë e Gjicit!
Duke qenë një tender me fitues të paracaktuar, Arlinda Poga është kujdesur të eliminojë konkurrentët me oferta ekonomike më të ulëta. Kështu, mes 6 kompanive të skualifikuara në fazën e parë të vlerësimit, komisioni ka eliminuar ofertën e “INA” shpk. Ky operator propozonte ta kryente këtë punë për 215,234,410 lekë pa TVSH. Për ta skualifikuar janë gjetur dy kleçka. Njëra është që mes mjeteve të kompanisë mungon një vinç me kosh. Tjetra është që kompania nuk ka paraqitur katalogët për pajisjet që do të instalohen tek dhoma e operacioneve. A nuk mund të komunikohej me operatorin që t’i plotësonte këto dokumente? Ia vlente, sepse oferta e kompanisë Safet Gjicit ishte dukshëm më e lartë: 229,721,533.60 lekë pa TVSH.
Por për Arlinda Pogajn nuk janë asgjë 150 milionë lekë më pak apo më shumë, rëndësi ka të kryejë porositë e Blendi Gonxhes. Prandaj, më 23 korrik 2025, OBP ka shpallur fituese kompaninë e Safet Gjicit.
Gjici nuk plotëson kriteret e tenderit
Sipas dokumentit të mëposhtëm, një nga kriteret e këtij tenderi për të provuar aftësitë teknike, është që kompania të ketë 90 punonjës dhe drejtuesi teknik të mos jetë i angazhuar në kontrata të tjera.
Po ashtu, për të përmbushur kontratën me afat 1 vit e gjysmë, kërkohet që kompania të angazhojë 50 mjete e pajisje në këtë kantier.
Sipas pasqyrave financiare të paraqitura zyrtarisht QKB, “Kevin Konstruksion” ka mesatarisht 63 punonjës.
Në këtë kontratë, Kevin Konstruksion ka marrë përsipër 89.2% të angazhimit, që do të thotë se duhet të angazhojë 81 punonjës.
Nga ana tjetër, kemi arsye të mendojmë se komisioni i vlerësimit të ofertave nuk ka bërë asnjë verifikim të kapaciteteve të kompanisë së Gjicit, por thjesht e ka shpallur fituese sipas urdhrit të Blendi Gonxhes.
Jo më larg se data 14 korrik 2025, kompania e Gjicit ka marrë nga bashkia Kavajë kontratën me objekt “Ndërtimi i lulishteve të qytetit”, me fond limit 22 733 333,00 lekë pa TVSH. Tenderi është fituar me “Flamur të kuq”, që tregon se Gjici po “rehabilitohet” edhe nga PD (krybashkiaku është demokrat) dhe përfiton fondin në shkelje të ligjit për prokurimet.
Në këtë kontratë Gjici është angazhuar të ketë 30 punonjës të tjerë, mes të cilëve drejtuesi teknik me kohë të plotë. Përveç kësaj duhen të jenë në kantier edhe 20 mjete e pajisje të ndryshme ndërtimi. Pyetja që lind është: Përse Arlinda Pogaj e kualifikon kompaninë e Gjicit, kur ky forcat punonjëse dhe mjetet i ka të angazhuara në kontrata të tjera në të njëjtën kohë?
Për të garantuar fitoren e kompanisë së Safet Gjicit, është angazhuar si bashkim operatorësh edhe Arbër Abazi me firmën “ALKO IMPEX CONSTRUCTION” sh.p.k e cili në mënyrë simbolike merr pjesë me 7.2%.
Roli i Abazit në këtë tender është thjesht politik, për të amortizuar kundërshtimet për “rehabilitimin” nga partia të Safet Gjicit. Ndërsa fuqinë punëtore, kompania e tij e ka të shpërndarë në shumë kantiere të tjera, ku ka fituar njëkohësisht miliona euro.
Kështu, mjafton të përmendim se në 10 korrik 2025, Arbër Abazi ka marrë kontratën e pastrimit të qytetit të Sarandës prej 1.3 miliardë lekë.
Në këtë punë publike, Abazi është angazhuar me 70 punonjës.
Në 2 korrik 2025, nga Bashkia Kavajë, Arbër Abazi ka marrë kontratën 3.3 miliardë lekë me objekt “Shërbimi i pastrimit të Njësisw Administrative Golem”. Këtu janë angazhuar 64 punonjës, sipas dokumenteve. Pa llogaritur edhe 5 kontrata të tjera që Abazi i ka të pambyllura aktualisht me shtetin.
Në këtë bashkëpunim është në mbështetje edhe kompania “APIS CONSTRUCTION” sh.p.k me pronar Ervin Tartarajn, me pjesëmarrje 3.6%. Prania e tij nuk ndihmon në asnjë drejtim, sepse nuk përmbush kriteret financiare për të marrë pjesë në tender.
Ky është grafiku i humbjeve që deklaroi vitin e fundit financiar Apis Construction. Pra, një kompani që rezulton me humbje nuk mund të futet në këtë super tender. Përse nuk është skualifikuar? Këtë e di vetëm Arlinda Pogaj.
Qershia mbi tortë vihet në fund nga vetë Arlinda. Duke shpallur fituesin e këtij tenderi fiktiv, drejtoresha e OBP, Arlinda Pogaj, nxjerr nga mënga emrin e një subjekti mbështetës. Në dokumentet e tenderit nuk përmendet asnjëherë emri i “PEPA Group” si operator mbështetës, madje as në rolin e nënkontraktorit.
Siç e pamë më lart, shkeljet në këtë tender janë të panumërta, por me sa duket janë imponuar nga sforcimi për të “rehabilituar” me shpejtësi Safet Gjicin. Kujtojmë se ish-krybashkiaku i Kukësit u lirua para kohe nga burgu, më 18 maj 2025, për “arsye shëndetësore”. Pas një skandali seksual, Gjici u dënua me 3 vite burgim për korrupsion pasiv dhe shpërdorim detyre. Atij iu hoq edhe e drejta për të ushtruar funksione publike për 5 vjet.
Bashkë me të, po ashtu e gjetur fajtore edhe Alma Kaçi. Ndërkohë, për protagonisten u shfuqizua vendimi i shkallës së parë që e shpalli fajtore për prostitucion dhe ajo u dënua vetëm për korrupsion aktiv, duke i dhënë në përfundim një vit heqje lirie.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post