Tërmet me magnitudë 8.8 në Rusi, alarm për cunami në Japoni dhe SHBA!

Një tërmet me magnitudë 8.8 ballë, më i fuqishmi në këtë rajon në gati 73 vite, është regjistruar në orët e para të mëngjesit në zonën detare pranë gadishullit rus Kamchatka, duke shkaktuar cunam në pjesë të Rusisë dhe Japonisë. Autoritetet kanë lëshuar alarme emergjente për banorët e shumicës së vendeve që lagen nga Oqeani Paqësor.

Sipas Ministrisë ruse për Menaxhimin e Emergjencave, qyteti Severo-Kurilsk, që ndodhet në pjesën veriore të arkipelagut të Ishujve Kurile, është përmbytur nga uji. Pamje të shpërndara në rrjete sociale tregojnë ujë të furishëm që përshkon rrugët dhe depërton në ndërtesa të këtij qyteti me rreth 2.000 banorë, të cilët janë evakuuar urgjentisht.

Nga Japonia, transmetimet e drejtpërdrejta televizive treguan banorë që largoheshin drejt zonave më të larta, me automjete ose në këmbë, veçanërisht në ishullin verior Hokkaido, ku u shënua një valë e parë cunami me lartësi rreth 30-60 cm.

Më shumë se 1.9 milionë njerëz në të gjithë Japoninë janë urdhëruar të zhvendosen në vende më të sigurta, pasi valët e cunamit godasin pjesë të ndryshme të bregdetit dhe transporti është ndërprerë në të gjithë vendin. Mediat ndërkombëtare njoftojnë se valët mbeten shumë më të vogla se sa ishte parashikuar më parë.

Po ashtu, evakuime ka pasur edhe në Shtetet e Bashkuara të Amerikës.  Guvernatori i Havait, Josh Green, u ka kërkuar njerëzve të ndjekin urdhrat e evakuimit dhe të qëndrojnë të qetë, ndërsa Presidenti i SHBA-së, Donald Trump, i këshilloi amerikanët të jenë në gatishmëri për paralajmërimet për cunami.

Sipas Institutit Amerikan të Studimeve Gjeofizike, tërmeti u regjistrua në orën 01:35 sipas kohës lokale, në një thellësi prej 20.7 kilometrash, rreth 126 kilometra larg nga qyteti kryesor i rajonit të Kamchatka, në skajin më lindor të Rusisë.

Fillimisht tërmeti u raportua si 8.0 ballë, më pas u përmirësua në 8.7 dhe përfundimisht në 8.8 ballë. Sipas Akademisë së Shkencave të Rusisë, ky është tërmeti më i fuqishëm i regjistruar në këtë zonë që prej vitit 1952.

🌊⚠️TSUNAMI WARNING

The #Japan Meteorological Agency has issued a tsunami warning after a powerful magnitude 8.7 earthquake struck near Russia’s Kamchatka Peninsula#Kamchatka #Russia #Update https://t.co/6YFyBzwUdn pic.twitter.com/HHpcS78gfv

— ⚡️🌎 World News 🌐⚡️ (@ferozwala) July 30, 2025