Gjatë marrjes në pyetje nga avokati i tij mbrojtës, Toby Cedman, Haradinaj ka thënë se është kthyer në Kosovë në momentin kur e ka marrë vesh se është sulmuar familja Haradinaj në Gllogjan të Deçanit. Haradinaj tha se aty ka qëndruar deri në kohën kur është plagosur.
“Legalisht unë hy në Kosovë si i armatosur më 1 janar 1998. Kthehem shkoj në Australi dhe atje marr vesh se sulmohet fshati im, konkretisht kushëriri im, ose familja, Haradinaj, Ramush Haradinaj. Prej atje e kam ndërpre vizitën dhe jam kthyer në Kosovë me 1 prill ose 2 prill të vitit 1998 dhe kam ndenjur aty derisa jam plagosur”, ka thënë ai.
Haradinaj foli edhe për formimin e “Brigadës 138” , në Koshare, ku tha se për formimin e kësaj Brigade kanë qenë në konsultim me oficerët amerikan dhe shqiptarë.
“Më vonë me kontributet e mia dhe të shokëve të mi kemi arritur të krijojmë ‘Brigadën 138’ në koshare që është i vetmi vend ku merret kazerma ushtarake. Ajo në Koshare është specifike sepse kemi qenë në konsultim me oficerë amerikan dhe shqiptar dhe mendoj se serbët i dinë mirë pasojat e kësaj lufte dhe kësaj Brigade. Madje po xhirojnë film për këtë duke e quajtur xhehenemi ose ferri i Koshares”, ka thënë ai.
Discussion about this post