Të huajt në burgjet britanike, kryesojnë shqiptarët

Në Mbretërinë e Bashkuar, është rritur numrri i shtetasve të huaj që mbahen në burgjet, ku mbizotërojnë shqiptarët.

Media e njohur britanike The Telegraph shkruan se ishin rreth 1 mijë e 731 kriminelë seksualë me kombësi të huaj në burg deri në qershor të këtij viti, një rritje prej 9.9 për qind brenda 12 muajve. Norma e rritjes ishte gati trefish më e lartë se ajo e britanikëve, ku numri i të burgosurve për krime seksuale u rrit me 3.8 për qind.

Të huajt përbëjnë një në tetën (12.3%) nga 87 mijë të burgosurit në Angli dhe Uells, numri më i lartë së paku në një dekadë dhe përqindja e dytë më e lartë në rekord, pak më poshtë 12.5 për qind në 2021.

Megjithatë, shifrat tregojnë se kriminelët e huaj kanë dyfish më shumë gjasa se britanikët të jenë në burg për krime lidhur me drogën, duke përbërë gati një në pesë (19.7 për qind) nga të gjithë të burgosurit për trafik ose posedim droge.

Shqiptarët, të cilët përbëjnë një numër të disproporcionuar të krimeve për drogë, mbeten grupi më i madh i të huajve në burg me 1 mijë e 193 të burgosur, megjithëse ky numër është ulur nga kulmi prej 1 mijë e 475 në vitin 2023. Pas tyre vijnë polakët (759), rumunët (716), irlandezët (707), lituanezët (339) dhe xhamajkanët (338).

Ka pasur rritje të ndjeshme gjatë vitit të kaluar në numrin e të huajve të mbajtur në burgje nga India (27 për qind rritje), Irani (10 për qind), Afganistani (28 për qind), Sudani (32 për qind) dhe Siria (46 për qind).