Një tjetër rast që ngre pikëpyetje mbi transparencën e Policisë së Shtetit. Në një njoftim zyrtar të shpërndarë për mediat, Policia deklaron se ka “arrestuar në flagrancë” 26-vjeçarin A. G., i cili dyshohet si bashkëpunëtor në plagosjen me armë zjarri të shtetasit J. A., ngjarje e ndodhur më 2 gusht 2025 në zonën e Freskut.
Por Maska.al ka mësuar nga burime të sigurta se i riu nuk është kapur në flagrancë, por është vetëdorëzuar në komisariat, një akt që për arsye të pashpjeguara ende, është prezantuar ndryshe nga autoritetet.
Kujtojmë se sipas Policisë, A. G. është bashkëpunëtor i shtetasit K. C. (L), i cili është ende në kërkim dhe konsiderohet si autori i dyshuar kryesor i plagosjes me armë. Policia bën me dije se hetimet vijojnë për kapjen e autorit dhe dokumentimin e plotë të ngjarjes.
Megjithatë, mënyra si është prezantuar dorëzimi i A. G. si “arrestim në flagrancë” lë vend për dyshime mbi qasjen e Policisë për të krijuar një narrativë të favorshme publike, në vend që të pasqyrojë faktet siç janë.
Discussion about this post