Shqipëria po përballet sot, të hënën më 11 gusht 2025, me një valë të nxehti përvëluese, duke shënuar një nga ditët më të nxehta të verës. Që në orët e para të mëngjesit, termometri ka regjistruar 23°C, ndërsa pritet që në mesditë dhe pasditë të ngjitet deri në 41–42°C, veçanërisht në zonat qendrore dhe ato të ulëta bregdetare.
Sipas parashikimeve, moti do të mbetet i kthjellët gjatë gjithë ditës, pa reshje, me diell të fortë dhe indeks të lartë rrezatimi UV. Temperaturat më të larta do të regjistrohen në intervalin orar 12:00–17:00, duke e bërë të rrezikshme qëndrimin e gjatë në ambiente të hapura.
Meteorologët këshillojnë qytetarët të shmangin ekspozimin direkt në diell gjatë mesditës, të konsumojnë sa më shumë ujë dhe të vishen me rroba të lehta dhe të hapura në ngjyrë. Po ashtu, apel për kujdes të shtuar u bëhet edhe të moshuarve, fëmijëve dhe personave me probleme kronike shëndetësore, të cilët janë më të ndjeshëm ndaj goditjeve nga nxehtësia.
Në mbrëmje pritet një rënie graduale e temperaturave, megjithatë ato do të mbeten të larta, duke zbritur vetëm deri në rreth 31°C në orët e vona.
Autoritetet e shëndetit publik rikujtojnë se rritja e ndjeshme e temperaturave rrit rrezikun e zjarreve në zona pyjore dhe kërkojnë bashkëpunimin e qytetarëve për të shmangur çdo veprim që mund të shkaktojë flakë.
Discussion about this post