Zjarret/ Situata ende problematike, 29 vatra ende aktive

Situata e zjarreve në vend është më e stabilizuar, megjithatë mbeten aktive 29 vatra në disa qarqe të Shqipërisë. Gjatë 24 orëve të fundit, strukturat operative kanë raportuar 57 vatra, ndërsa puna po vijon me intensitet për shuarjen e atyre që mbeten të ndezura.

Njoftimi i Emergjencave Civile detajon situatën në qarqet kryesore të prekura:

Bilanci i zjarreve sipas qarqeve

Qarku Vlorë: Vazhdon puna në vatrën e zjarrit në Syrin e Kaltër, ku forca të shumta po operojnë në lartësitë e Malit të Sopotit. Aktive mbetet edhe vatra në fshatrat Pecë, Sirikat dhe Kardhikaq në Bashkinë Finiq, si dhe në Kuç, njësia administrative Horë-Vranisht. Në fshatin Brataj ka rënë një vatër e re, ku po punojnë zjarrfikësit.

Qarku Dibër: Zjarri në Malin me Gropa të Martaneshit, në një zonë të mbrojtur, po mbahet nën kontroll. Ndërkohë, në fshatin Tërnovë, flakët janë me intensitet të lartë, por pa rrezikuar banesat. Në terren janë angazhuar forca të shumta nga MZSH, forca pyjore, bashkiake dhe efektive të Forcave të Armatosura.

Qarku Berat: Situata mbetet kritike në fshatrat Zhapokikë, Plashnik dhe zonën e mbrojtur “Rezervati i Menaxhuar Balloll” në Poliçan, ku dje u evakuan 20 banorë. Në ndihmë të forcave tokësore janë angazhuar dy helikopterë nga Emiratet e Bashkuara Arabe, si dhe dy helikopterë që po operonin në Gramsh. Në fshatrat e tjerë si Velçan, Orizaj dhe Vokopolë, zjarret janë nën kontroll.

Qarku Tiranë: Zjarret në Malin e Bërzhitës, si dhe në fshatrat e Bashkisë Rrogozhinë, janë vënë nën kontroll pas ndërhyrjes së menjëhershme. Në disa zona, tereni i vështirë malor ka bërë që flakët të mos shuhen plotësisht, por rreziku për banesat është shmangur.

Qarku Gjirokastër: Puna vazhdon për shuarjen e zjarrit të ardhur nga Finiqi, i cili u përhap në dy fronte, por u vu nën kontroll. Në Hormovë, zjarri është aktiv vetëm në lartësi të Majës së Golikut. Në Malin e Sopotit, vatra e re pranë antenave të RTSH-së po monitorohet vazhdimisht.

Qarku Elbasan: Që në orët e para të mëngjesit, ka vijuar puna për shuarjen e zjarrit në fshatin Kullollas të Gramshit, ku janë angazhuar forca zjarrfikëse, forca bashkiake, vullnetarë dhe Forca të Armatosura, të mbështetur nga dy helikopterë të huaj (çek dhe sllovak).

Në total, në operacionet për shuarjen e zjarreve u angazhuan 1,143 forca operacionale, të mbështetura nga 409 ushtarë, 65 automjete zjarrfikëse dhe 23 mjete të tjera. Në ndihmë erdhën edhe 7 helikopterë dhe 1 avion Canadair nga Italia.

Vatra zjarri janë raportuar edhe në qarqet Shkodër, Kukës dhe Korçë, ku puna e forcave në terren po vijon për izolimin dhe shuarjen e plotë të flakëve. Në fshatin Gërmenj të Kolonjës, situatën e kanë vështirësuar edhe shpërthimet e municioneve që ndodheshin në perimetrin e zjarrit.