Kryebashkiaku Ermal Dredha nuk ndahet nga miqtë e vjetër, me të cilët po ndan buxhetin e bashkisë Vlorë. E ndërsa rrugët e lagjeve të Vlorës kanë mbetur si në Gaza, kryebashkiaku vazhdon bën tendera pa garë. Afro 500 milionë lekë i janë dhënë së fundmi kompanisë “Avduli” shpk nga paratë e taksapaguesve vlonjatë.
Tenderi me “flamur” korrupsioni
Bëhet fjalë për tenderin e Bashkisë Vlorë me objekt “Rikonstruksioni i rrugës “Zenel Gjoleka” (te ujësjellësi). Fondi limit që kishte ndarë komisioni i Dredhës është 45 833 333,00 lekë pa TVSH. Tenderi u njoftua më 4 qershor 2025 dhe u mbajt pas dy javëve. Megjithëse ishin 8 pjesëmarrës sipas dokumenteve, procedura ishte krejt fiktive.
Open Data e Albania e ka klasifikuar tenderin me risk korrupsioni dhe e ka shënuar me “Flamur të kuq”. “Skualifikim i të gjithë operatoreve konkurrues përveç fituesit/ Skualifikim i ofertës me vlerë më të ulët”, përshkruhet nga monitoruesi antikorrupsion.
Komisioni i bashkisë për t’ia lehtësuar rrugën kompanisë “Avduli” shpk ka eliminuar konkurrencën duke skualifikuar kompanitë e tjera. Nga ana tjetër nuk është përfillur kriteri ekonomik, por vetëm shpërblimi i miqësisë që ka pronari i kësaj firme me kryebashkiakun.
Konkretisht, oferta e “AVDULI” shpk nuk ishte më e ulëta, megjithatë është shpallur fituese.
Dhe më 4 gusht 2025 është bërë zyrtar fituesi i tenderit nga bashkia Vlorë me letra të kopsitura më së miri.
Marrëveshje mes operatorëve për ofertat?
Ajo që bie në sy është se, e vetmja “konkurrencë” ishte mes “Avduli” shpk dhe “RSM Company” e Agim Kolës. Çuditërisht, kjo e fundit ka bërë ofertë “anomalisht të ulët”. Pra, një kompani e me eksperiencë të gjatë në prokurime bën një gabim aritmetik që e skualifikon. Dyshimet mbi rolin e saj në tenderin fiktiv lindin nga fakti se Arben Avduli dhe Agim Kola janë partner biznesi. Në datën 2 prill 2025, dy kompanitë u paraqitën të bashkuara dhe morën tenderin “Rikonstruksion i Godinës nr.8 në Shtëpinë e Pushimit të Ushtarakëve Durrës”, me fond limit 400 milionë lekë nga Operatori i Blerjeve të Përqendruara, që është në varësi të ministrit Blendi Gonxhe.
Pra, në ngremë dyshimin se këtu ka pasur marrëveshje të heshtur mes dy partnerëve duke koordinuar ofertat.
Mashtrimet e Arben Avdulit kapen nga KLSH
Arben Avduli mashtron në zbatimin e kontratave me dokumente të rreme të punimeve. Kjo është faktuar nga auditimi i kontrollit të Lartë të Shtetit. Më 9 tetor 2020, Laert Duraj, në atë kohë drejtor i Postës Shqiptare, i jepte kompanisë së Avdulit tenderin për rikonstruksionin e zyrave postare të filialeve Vlorë, Sarandë dhe Gjirokastër.
Si procedurë zgjidhej negocimi pa njoftim, që do të thotë se pazari ka mbaruar para mbajtjes së tenderit. Kjo është bërë në kundërshtim me ligjin, sepse vlera e tenderit është mbi kufirin e parashikuar për këto lloji procedurash.
Nga ana tjetër, oferta fituese ishte fiks sa fondi limit: 6 699 766,00 lekë. Për më tepër, kompania fituese duhet të plotësojë kriteret e vendosura nga autoriteti kontraktor.
Kontrolli i Lartë i Shtetit, në një raport auditimi të veprimtarisë së Postës Shqiptare, ka gjetur se “Avduli” shpk nuk i plotësonte kriteret e vendosura.
Arben Avduli ka vazhduar më tej, duke manipuluar faturat e tenderit, përmes situacioneve false për punime të pakryera, ndërsa mbikqyrja e punimeve është kryer në konflikt interesi.
Avduli, klient i tenderave pa garë
Kompania “Avduli” shpk, ka fituar me “Flamur të kuq”, në pjesën dërrmuese të prokurimeve ku ka marrë pjesë. Në tetor 2024, kryetari i Bashkisë Kuçovë, Hajdari i dha Avdulit 234 milionë lekë të planifikuar për të riparuar rrugicat në lagjen 1 Maji në Kuçovë.
Bëhet fjalë për tenderin me objekt ‘Rikualifikimi i rrugëve Mersin Dyrmo, Nënstacioni, Lord Bajron, Riza Alizoti’.
Po kështu, kryebashkiaku Ermal Dredha, në janar 2025, e shpërbleu mikun e tij me tenderin 125 milionë lekë. Në procedurën e prokurimit me objekt “Rikonstruksioni i rrugës së 7 (shtatë) Pallateve”, “Avduli” shpk u shpall fitues me ofertën më të shtrenjtë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post