Një tjetër rast shqetësues ka nxjerrë në pah problemet me sigurinë në kompleksin luksoz “Valamar” në Gjirin e Lalzit, i cili ruhet 24 orë nga kompania private “ARB Security”.
Disa ditë më parë, një vilë e kyçur të një emigranti në kompleksin luksoz “Valamar”, në Gjirin e Lalzit, ra pre e një grabitjeje spektakolare, teksa një tjetër vilë është tentuar që të vidhet nga një hajdut dhe sistemi i sigurisë së ARB Security ka dështur.
Në denoncimin për BoldNews.al, qytetari shkruan se një vilë është tentuar që të grabitet nga hajdutët në bllokun C të kompleksit ‘Valamar’.
Sipas denoncuesit, hajduti është futur ne shtëpi edhe pse ka pasur njerëz, duke vënë në pikëpyetje sistemin e sigurisë së vilave dhe patrullimet që bën ‘ARB Security’ në kompleks. Ai është zbuluar nga të pranishmit dhe më pas është larguar me vrap nga vetrata.
Më tej denoncuesi bën me dije se kjo grabitje është tentuar që të kryehet në bllokun e administruar nga Lulzim Mehmetaj, një biznesmen i njohur për lidhjet e tij me pushtetin, pasi ka përfituar disa tendera me vlerë miliona euro nga pushteti qendror dhe lokal. Ndërsa grabitja e 4 gushtit, ndodhi në bllokun e administruar nga kompania e Dritan Agollit.
“Një tjetër vilë goditet nga skifterët në Valamar. Te blloku C. Hajduti është futur në shtëpi edhe pse ka pas njerëz. Është zbuluar nga banorët dhe ka ikur me vrap nga vetrata. Përsëri ARBSecurity në gjumë. Ndërsa një javë më parë është vjedhur në bllokun e administruar nga kompania e Agollit, kësaj here ne bllokun e administruar nga Lulzim Mehmetaj”, thuhet në denoncim.
Kjo ngjarje vë në diskutim sigurinë e një prej komplekseve më luksoze në bregdetin shqiptar. Hajdutët si duket, mund të futen dhe të kryejnë grabitje lirshëm, pasi sistemi i sigurisë së ARB Security ka dështur.
Detyra e patrullave të kësaj kompanie është sigurimi i hyrje-daljeve dhe, mbi të gjitha, siguria e pushuesve dhe pronës së tyre, por duket se ‘skifterë’ fut lirshëm në kompleksin luksoz.
Çfarë ndodhi në 4 gusht në kompleksin Valar?
Në orët e para të së hënës së 4 Gusht 2025, vila e kyçur e një emigranti në kompleksin luksoz “Valamar”, në Gjirin e Lalzit, ishte pre e një grabitjeje spektakolare. Në fakt, vjedhja në vetëvete nuk është ndonjë rast i çuditshëm, madje edhe i rëndomtë.
Por, mënyra se si ka ndodhur, ose më saktë “kodi i heshtjes Omerta” që ka rrethuar këdo rreth vilës dhe ata që duhet të ruanin apo të punonin për zbardhjen e ngjarjes, krijon dyshimet se kjo është një vjedhje që duhet mbuluar.
Objekti i grabitjes, pra vila ku është bërë vjedhja, është pronë e një shtetasi shqiptar, i cili jeton dhe punon prej vitesh jashtë Shqipërisë. Autorët duket se kanë pasur informacion të saktë që preja e tyre ishte i thjeshtë për t’u grabitur, pasi në të nuk kishte njeri.
Policia dhe Prokuroria e Durrësit janë treguar tërësisht inaktive për të kryer verifikimet e rastit dhe, mundësisht, për të zbuluar autorët e grabitjes. Deri më tani, asnjë nga institucionet ligjzbatuese nuk ka dhënë, më së paku, një informacion paraprak për ngjarjen. Duke pasur parasysh se zyrat policore përmbysin redaksitë e lajmeve gjatë verës me “masat e ndërmarrja për sigurimin e sezonit turistik”, heshtja për vjedhjen në një kompleks luksoz bregdetar tingëllon keq.
Kompleksi “Valamar” ruhet 24 orë nga shërbimi i Sigurisë Private, “Arb Security”. Detyra e patrullave të kësaj kompanie është sigurimi i hyrje-daljeve dhe, mbi të gjitha, siguria e pushuesve dhe pronës së tyre. Por, të paktën mesnatën, duke hyrë kjo javë, ‘Arb Security” duket se ka qenë në gjumë. Grabitësit kanë hyrë dhe dalë të qetë nga vila, pa u shqetësuar, pa u pikasur dhe, ‘afërmendsh”, edhe pa u zbuluar dhe ndaluar.
Discussion about this post