Bolivia është gati të zgjedhë një president jo të majtë për herë të parë pas pothuajse dy dekadash sundimi pothuajse të vazhdueshëm nga partia aktuale Lëvizja për Socializëm (MAS), sipas rezultateve zyrtare paraprake.
Senatori Rodrigo Paz Pereira dhe ish-presidenti Jorge Quiroga, fituan më shumë vota dhe zunë përkatësisht vendin e parë dhe të dytë në zgjedhjet presidenciale të së dielës. Por asnjë prej tyre nuk mori përqindjen e mjaftueshme të votave për të siguruar një fitore të plotë, kështu që vota do të shkojë në një balotazh midis këtyre dy kandidatëve, që do të zhvillohet në tetor.
Autoritetet zgjedhore bënë me dije se mund të duhen deri në tre ditë për të finalizuar rezultatet përfundimtare.
Fushata e Paz Pereira u përqendrua në rishpërndarjen e më shumë fondeve nga qeveria qendrore drejt njësive rajonale dhe në luftën kundër korrupsionit – me sloganin e tij “kapitalizëm për të gjithë, jo vetëm për disa”.
Ai ka sugjeruar një program kredie të aksesueshme, lehtësime tatimore për të nxitur ekonominë formale dhe eliminimin e barrierave të importit për produktet që Bolivia nuk i prodhon.
Ndërsa Quiroga shërbeu për një kohë të shkurtër si president i përkohshëm nga viti 2001 deri në vitin 2002, pasi shërbeu si zëvendëspresident i Hugo Banzer, një diktator ushtarak, derisa u zgjodh më vonë.
Zgjedhja e një presidenti jashtë kampit të majtë ka të ngjarë të sjellë ndryshime të ndjeshme në politikën e jashtme të vendit latino-amerikan.
Për sa i përket tregtisë, qëndrimet kapitaliste të të dy kandidatëve mund të tregojnë më shumë mbështetje për investimet e huaja në rezervat e mëdha të litiumit të Bolivisë – përbërësi kryesor për bateritë e përdorura në shumë makina elektrike, laptopë dhe panele diellore.
Kthesa e vendit djathtas vjen në një kohë kur po përjeton krizën më të keqe ekonomike në vite, me mungesa të karburantit, rezervave të huaja dhe disa artikujve ushqimorë, si dhe inflacion dhe borxh të lartë.
Discussion about this post