Në vazhdën e hetimeve për dosjen ndaj ish-kryebashkiakut të Tiranës, Erion Veliaj, vëllai i tij, Arbër Veliaj, është paraqitur në ambientet e SPAK-ut. Ai u mor në pyetje për më shumë se pesë orë.
Në një prononcim shkurt para mediave pas daljes nga SPAK, Arbër Veliaj tha se kishte “ardhur vullnetarisht të sqaroj pozicionin”.
“Erdha vullnetarisht për të shprehur bashkëpunimin tim me institucionin”, tha ai.
Paraqitja e Arbër Veliajt në SPAK vjen pas vendimeve të ndryshme gjyqësore që lidhen me kontrollet e ushtruara në shtëpitë dhe bizneset e tij. Ndonëse Gjykata e Lartë kishte pranuar rekursin e tij dhe kishte kthyer dosjen për rigjykim, Apeli i Posaçëm vendosi mospranimin e ankimit kundër vendimit për kontrolle.
Hetimi ndaj Erion Veliajt dhe bashkëshortes së tij, Ajola Xoxa, është finalizuar më 23 korrik, me akuzat për korrupsion, deklarim të rremë të pasurisë dhe pastrim parash. Veliaj ndodhet në paraburgim që prej 10 shkurtit dhe dyshohet se ka qenë në një skemë kriminale me gjashtë sipërmarrës, përfshirë biznesmenin Elman Abule.
Discussion about this post