Xhesion Toromeni, 25-vjeçari i dyshuar për vrasjen e Besmir Kumrias më 19 gusht në Divjakë, ka pranuar autorësinë e krimit gjatë seancës gjyqësore të mbajtur ditën e sotme.
Në seancën për caktimin e masës së sigurisë, Gjykata e Fierit vendosi masën “arrest me burg” për Toromenin. Seanca u zhvillua me dyer të mbyllura, ndërsa mësohet se autori i dyshuar ka shfaqur pendesë për veprën e kryer.
“Mu errën sytë kur e pashë Besmirin në kafe. Më kapi inati dhe më erdhi ndërmend rrahja që i kishin bërë babait tim disa vite më parë. Nxora biçakun dhe e godita. Ndiej që kam gabuar”, është shprehur ai para trupit gjykues.
Ngjarja e rëndë dyshohet se ka ardhur si pasojë e një konflikti të vjetër mes familjes së autorit dhe viktimës lidhur me një kanal vaditës.
Sipas hetimeve, ditën e krimit Besmir Kumria ndodhej në një lokal së bashku me miqtë e tij, kur Toromeni hyri papritur dhe e goditi me thikë. 32-vjeçari humbi jetën nga plagët e marra, ndërsa autori u largua nga vendngjarja, por u arrestua disa orë më vonë.
Viktima, që prej kohësh punonte në Himarë, ndodhej në Divjakë për të përcjellë bashkëshorten e tij drejt Gjermanisë, ku ajo kishte nisur punë si infermiere.
Discussion about this post