Partia Demokratike tha sot se sistemi shëndetësor publik ndodhet në një situatë alarmante.
Zëdhënësja e Antikorrupsionit në PD, Genta Vangjeli nëpërmjet një deklarate për mediet tha sot se Qendra Spitalore Universitare “Nënë Tereza” ka dhënë “urdhër për ndalimin e analizave laboratorike për pacientët, për shkak të tejkalimit të buxhetit mujor të koncesionarit privat që menaxhon këtë shërbim”.
Duke iu referuar sipas saj “një emaili të brendshëm të QSUNT-së, dëshmohet qartë se pacientët nuk mund të marrin analiza bazike shëndetësore nëse është arritur ‘tavani financiar’ i përcaktuar në kontratën koncesionare”.
Sipas Vangjelit, ky precedent i rrezikshëm tregon qartë se në sistemin aktual shëndetësor shqiptar, jeta e pacientëve është kushtëzuar nga kufizime financiare, të imponuara nga kontrata të dyshimta publike-private.
“PD kërkon me urgjencë të ndërpriten menjëherë praktikat që kufizojnë aksesin e qytetarëve në shërbime shëndetësore për arsye financiare. Të mbahet përgjegjësi institucionale dhe ligjore për këtë skandal dhe pasojat që mund të ketë për shëndetin e pacientëve. Të riorientohet buxheti publik drejt shëndetësisë dhe mbrojtjes së jetës së qytetarëve, jo drejt projekteve të panevojshme apo klienteliste”, theksoi Vangjeli.
Discussion about this post