Policia e Shtetit ka njoftuar planin e masave me qëllim garantimin e rendit dhe sigurisë publike në kuadër të vitit të ri shkollor 2025-2026 që starton më 8 shtator.
Në këtë kuadër, komisariatet për shkollat që kanë në juridiksion, do sigurojnë prezencë policore në orarin e fillimit dhe të mbarimit të mësimit, gjatë pushimit të madh apo gjatë ndërrimit të turneve në shkolla.
Policia Rrugore do të ketë një prani të shtuar në akset rrugore, veçanërisht pranë shkollave që ndodhen pranë rrugëve kryesore, si në fillim ashtu edhe në përfundim të procesit mësimor.
Masat përfshijnë gjithashtu kontrolle rigoroze ndaj drejtuesve të automjeteve që kryejnë transportin e nxënësve në shkolla, duke përfshirë testet për alkool, kontrollin teknik të automjeteve dhe zbatimin e rregullave të transportit të nxënësve.
Për parandalimin e veprimtarive kriminale që cenojnë sigurinë e nxënësve, do qëndrojnë në gatishmëri ndihmës specialistët e policisë në zona dhe punonjësit e Policimit në Komunitet.
Drejtori i Drejtorisë së Rendit Publik, Agron Çeli deklaroi se në bashkëpunim me Inspektoratin Shtetëror Shëndetësor, AKU-në dhe pushtetin vendor, do të punohet për mbylljen apo largimin e lokaleve të tregtisë dhe pikave ambulante të shitjes që tregtojnë pije alkoolike, produkte ushqimore të skaduara pranë shkollave, të cilat sipas tij, jo rrallë herë shërbejnë dhe si pika të grumbullimit të shtetasve me precedent kriminal, përdoruesve të pijeve alkoolike dhe lëndëve narkotike, si dhe burim rreziku për prishje të rendit publik apo veprime të tjera të dhunshme ndaj personelit mësimdhënës dhe nxënësve të shkollave.
Një tjetër masë përfshin kontrollin në portat e hyrjes në shkolla të nxënësve që mund të mbajnë me vete sende të kundërligjshme. Kontrolli do të kryhet nga personeli roje i shkollës dhe oficerët e sigurisë, në prani të mësuesve dhe në mbikëqyrjen e punonjësit të Policisë.
Në rastet e njoftimeve të rreme, që shkaktojnë panik te nxënësit dhe stafet pedagogjike, Policia në bashkëpunim me prokuroritë do vënë para përgjegjësisë ligjore autorin/ët.
Discussion about this post