Shtetet e Bashkuara të Amerikës dhe Kina kanë planifikuar të rifillojnë bisedimet javën e ardhshme në mosmarrëveshjen e tyre të vazhdueshme për tarifat, tha sot Departamenti Amerikan i Thesarit.
Sekretari i Thesarit i SHBA-së, Scott Bessent, do të takohet me përfaqësuesit kinezë, përfshirë zëvendëskryeministrin He Lifeng, në Madrid. Ai drejtoi negociatat e mëparshme për Pekinin.
Nuk pati konfirmim të menjëhershëm nga autoritetet kineze. Sipas deklaratës së SHBA-së, Bessent do të diskutojë çështje ekonomike, tregtare dhe të sigurisë kombëtare, si dhe për aplikacionin e mediave sociale TikTok.
Koha e saktë e takimeve nuk është konfirmuar. Bessent ka planifikuar të vizitojë Spanjën dhe Britaninë e Madhe nga 12 deri më 18 shtator.
Dy ekonomitë më të mëdha, kohët e fundit zgjatën pauzën në mosmarrëveshjen e tyre për tarifat me 90 ditë.
Bisedimet në Madrid do të pasojnë raundet e mëparshme në Gjenevë, Londër dhe Stokholm.
Uashingtoni po e nxit gjithashtu çështjen e shitjes së TikTok-ut në SHBA. Afati i zgjatur nga presidenti Donald Trump për arritjen e një marrëveshjeje, përfundon më 17 shtator.
Për shkak se TikTok-u është në pronësi të “Bytedance” të Kinës, zyrtarët kanë ngritur shqetësime se qeveria kineze mund të hyjë në të dhënat e SHBA-së ose të ndikojë në opinionin publik. TikTok-u i ka mohuar këto pretendime.
Discussion about this post