Presidenti Begaj mandaton Ramën për formimin e qeverisë së re

Presidenti Bajram Begaj mandatoi sot kryetarin e Partisë Socialiste, Edi Rama për formimin e qeverisë së re.

Presidenti Begaj dorëzoi dekretin e mandatimit tek Rama mesditën e sotme në Presidencë.

Në dekretin e Presidentit, thuhet se Edi Rama emërohet Kryeministër i Shqipërisë. dekret gjithashtu thuhet se Kryeministri ushtron edhe përgjegjësitë për ngritjen dhe funksionimin e Ministrit Virtual të Inteligjencës Artificiale “Diella”.

Sipas procedurave, sekretari i Përgjithshëm i PS-së dërgon emrin e kryeministrit. Më pas është kryeministri që paraqet emrat e kabinetit të ri në Presidencë.

Pasi Presidenti merr kërkesën, ka 6 ditë kohë për të bërë dekretimin. Kryeministri gjithashtu do t’i paraqesë Kuvendit përbërjen e qeverisë së re dhe programin qeverisës. Pas votëbesimit, kabineti qeveritar do të shkojë për dekretim dhe betim tek Presidenti.

Mëngjesin e sotëm në Kuvend u mbajt seanca e parë e kësaj legjislature ku u miratua nga socialistët Komisioni i Përkohshëm për Verifikimin e Mandateve.

Pas ngritjes së komisionit, drejtuesi i seancës Vasil Llajo bëri me dije se do të verifikohen mandatet dhe seanca e ardhshme do të zhvillohet sot në orën 17:00.

Seanca u shoqërua me tensione me demokratët që denoncuan se mazhoranca shkeli rregulloren e Kuvendit. Sipas PD, nuk mund të ndryshohen komisionet pa u ndryshuar rregullorja e Kuvendit.