Ndërhyrja e dronëve rusë në hapësirën ajrore të Polonisë këtë javë ishte e papranueshme, tha Sekretari i Shtetit i SHBA-së Marco Rubio duke shtuar se edhe pse dronët u “lëshuan qëllimisht” nga Moska, ende nuk dihet nëse ata e kishin në shënjestër konkretisht Poloninë.
“Ne mendojmë se është një zhvillim i papranueshëm, i pafat dhe i rrezikshëm”, u tha Rubio gazetarëve para se të nisej për një udhëtim në Izrael.
“Nuk ka dyshim për këtë: dronët u lëshuan qëllimisht. Pyetja është nëse dronët ishin në shënjestër për të shkuar konkretisht në Poloni”, shtoi ai.
Të premten, NATO zbuloi planet për të forcuar mbrojtjen e frontit të saj lindor pas një incidenti në të cilin Polonia rrëzoi dronë që hynë në hapësirën e saj ajrore – duke shënuar rastin e parë të konfirmuar të një anëtari të NATO-s që u angazhua ushtarakisht gjatë luftës së Rusisë në Ukrainë.
”Nëse përcaktohet se dronët kishin për qëllim të shënjestronin Poloninë, nëse provat na çojnë atje, atëherë padyshim që ky do të jetë një veprim shumë përshkallëzues”, shtoi Rubio.
“Ekzistojnë edhe një numër mundësish të tjera, por mendoj se do të donim të kishim të gjitha faktet dhe të konsultoheshim me aleatët tanë përpara se të merrnim vendime specifike”, deklaroi më tej ai.
Të mërkurën, 19 dronë rusë kaluan në hapësirën ajrore polake në shkeljen më të madhe që kur Moska nisi luftën e saj në shkallë të plotë kundër Ukrainës.
Discussion about this post