Inspektori i Lartë i Drejtësisë nuk do të nisë një hetim disiplinor ndaj prokurores së Shkodrës, Elsa Gjeli, e cila u kritikua publikisht nga kryeministri Edi Rama për mospaditjen e një ndërtimi pa leje në zonën e mbrojtur të Thethit.
Në një letër zyrtare drejtuar ministrit të Drejtësisë, ILD bën të ditur se pas verifikimeve paraprake të kryera mbi ankesën e paraqitur më 10 korrik, nuk janë konstatuar elementë juridikë apo faktikë që do të justifikonin nisjen e një hetimi disiplinor ndaj prokurores Gjeli. Për këtë arsye, kërkesa është arkivuar.
“Nuk konstatohen elementë juridikë apo faktikë të cilët i krijojnë Inspektorit të Lartë të Drejtësisë një dyshim të arsyeshëm për fillimin e hetimit disiplinor ndaj magjistrates Elsa Gjeli”, thuhet në vendimin zyrtar të ILD, të datës 15 korrik 2025.
Në të njëjtën letër, ILD njofton se, në përputhje me legjislacionin në fuqi, ministri ka të drejtë të ankimojë vendimin pranë Këshillit të Lartë të Prokurorisë brenda një jave nga data e marrjes së vendimit të arsyetuar.
Prokurorja Elsa Gjeli u vu në qendër të vëmendjes pas kritikave të ashpra të kryeministrit Rama më 7 korrik, kur qeveria ndërhyri për të shembur disa ndërtime pranë kishës në fshatin turistik të Thethit. Rama e akuzoi atë për mbylljen e një çështjeje penale të lidhur me këto ndërtime, që sipas tij ishin të paligjshme dhe të lidhura me figura të botës së krimit.
Discussion about this post